Tusagassiorfiit: Folketingimut qinersinissaq ministeriunerup ullumi suaarutigissavaa

Folketingimut qinersisoqarnissaa pisortatigoortumik suli nalunaarutigineqanngilaq, ministeriunerli Christiansborgimi Spejlsalenimi tusagassiortunik massakkorpiaq katersortitsivoq.

Ministeriunerup tusagassiuutinut nalunaarutaani ima allassimavoq, issuaaneq:

- Statsminister Helle Thorning-Schmidt oqaaseqaateqarniarpoq. Apeqquteqartoqarsinnaanavianngilaq. Issuaaneq naavoq.

DR Nyhederip tusarsimanerarpaa Helle Thorning-Schmidtip Folketingimut qinersisoqarnissaa tusagassiortunik katersortitsinermi nalunaarutigiumaaraa.

Qaqugu qinersisoqassanersoq suli tusarliunneqanngilaq, juunilli 16-iani 17-ianiluunniit qinersisoqarnissaa eqqoriarneqarpoq.

Folketingimullu qinersisoqarnissaanut nalunaarutiginnittoqarnissaanut isumaliutersuutit qaammaterpassuit kingulliit ingerlanerinni annineqarsimasut taamaalillutik piviusunngussapput, qineqqusaarnerlu pisortatigoortumik aallartissinnaassalluni.

Helle Thorning-Schmidtili ministeriunertut ingerlaqqinnissani qulakkeerniaruniuk unammilligassaqarpoq.

Naak partiia Socialdemokratit inunnik isumasiuinerni kingullerni siuariaraluartut, partiit talerperliit, Venstrep siulittaasua Lars Løkke Rasmussen siuttoralugu, qinersinermi ajugaassangatinneqarput.

Partiit Venstre, Dansk Folkeparti, Liberal Alliance Det Konservative Folkepartilu katillutik 90-inik ilaasortaatitaqalissangatinneqarput, partiillu naalakkersuisuutitaqartut, Socialistisk Follkeparti, Enhedslisten kiisalu partii nutaaq Alternativet tapersersortigalugit 85-inik ilaasortaatitaqalissangatinneqarlutik. Savalimmiut Kalaallit Nunaatalu ilaasortaatitaat isumasiuinermi ilaatinneqanngillat.

Partiit talerperliit 52 procentinit taaguunneqassangatinneqarput, saamerliillu 48 procentinit.