Ministeri Kalaallit meerartai pillugit iliuuseqarusulersoq

Danmarkimi Isumaginninnermi ministeri Eva Kjer Hansen feeriareerluni uteruni suliassaqassaqaaq.

Ilaatigut suliassarissavai meeqqanik atornerluinermut tunngasut.

Isumaginninnermut ministerip kissaatigaa, kikkulluunniit meeqqanik paarsilluarnerusinnaasariaqartut, kaammattuivorlu meeqqat mittatigineqarsimappata tamatta oqaatigisinnaasariaqaripput, taama allappoq, aviisi Jydske Vestkysten.

Eva Kjer Hansenip ernummatigaattaaq Kalaallit Nunaanni meeqqat kinguaassiutitigut atornerlunneqartartut aammalu annersarneqartartut.

Tassungarpiaq tunngassutillit ministerip akisussaaffigivallaanngikkaluarlugit kalaallit meerartaasa sumiginnarneqaleraluttuinnarnerannik ikiuukkumalluni neqeroorpoq.

- Kalaallit Nunaanni pissutsit pinartutut isigisariaqarput, meeqqat Kalaallit Nunaanniittut ajunnginnerusumik atugaqartinneqarnissaannut iliuuseqarnissatsinnik piareersimavugut. Kalaallit Nunaallu tamanna pillugu ikiorneqarusukkuni oqaannassaaq, Isumaginninnermi ministeri Eva Kjer Hansen oqarpoq.