Ministereqarfiit nunap inoqqaavinik suleqateqartussat pilersinneqartut
Nunap inoqqaavinut ministereqarfiup atorunnaarsinneqarnissaanik aalajangerneq premierminister Trudeauimit aggustip naalernerani nalunaarutigineqarpoq.
Makivik Corporationip præsidentiata Jobie Tukkiapikip tusagassiortunut oqaatigaa taamatut pisoqalernera Nunavummiut nuannaarutigigaat, aaqqissuussinerit nunasiaateqarnerup nalaaneersut, Inuit Canadamilu naalakkersuisut suleqatigiinnerannik ajornakusoortitsisut taamaaliornikkut millisarneqassammata.
Ministereqarfiup maanna atorunnaartup indianerinut tunngatillugu inatsisiliorneq aallutarinerusimavaa, taamaammat Jobie Tukkiapikip neriuutigaa ministereqarfittaap naggueqatigiit Inuit Canadami immikkut ittumik inissisimanerat eqqarsaatiginerussagaa.
Nunap inoqqaavinut ministeriusimasoq, Carolyn Bennett, Canadami naalakkersuisut nunallu inoqqaavisa nutaanik atassuteqarnerannut ministeritut toqqarneqarpoq.
Jobie Tukkiapikip Carolyn Bennettip suleqatiginissaa qilanaarivaa, taanna Makivik Corporationip præsidentia naapertorlugu naalakkersuisut Inuillu akornanni pitsaanerusumik atassuteqalernissap sulissutigineqarnissaa soqutigalugu takutereersimammagu.
- Ministereqarfiup nutaap naggueqatigiinnut Inunnut Nunavimmiittunut Inuillu Nunaannut tamarmut pingaarutilinnik siuariartorfiunissaa qilanaarivarput, Jobie Tukkiapik oqarpoq.