Ritzau Nunanit allanit

Millionit affaasa missaat akerliussutsiminnik Washingtonimi takutitsipput

Donald Trumpip USA-mi præsidentitut ivertinneqarneranit ulloq ataasiinnaq qaangiutiinnartorlu, Donald Trumpip arnat pillugit isummersortarnera akerliuffiginiarlugu arnat nunarsuarmi illoqarfinni assigiinngitsuni 600-ni akerliussutsiminnik takutitsipput.

Allattoq Ritzau

januaarip 21-at 2017 18:40

Nutserisoq Mads Lynge

Trumpip arnat pilluigt isummersortarnera nunarsuarmi illoqarfinni assiigiinngitsuni 60-ni akerliuffigineqarpoq, akerliussutsimillu takutitsinerit annersaat USA-p illoqarfiisa pingaarnersaanni pivoq:

- Trumpip napparsimalersinnaanermut sillimmasersinnaanermut, nunasiniartunut naartunaveersaartitsiniarnermullu tunngasunut isummersortarnera akerliuffiginiarlugu ilungersortariaqartutut misigisimavunga, oqaaserisimasaalu allat akerliuffigisinnaasakka aamma amerlaqaat, tarnip pissusaanik immikkut ilisimasalik Jesse Carlock, USA-mi nunap immikkoortuani Ohiomi illoqarfiit ilaannit Daytonimeersoq, maannalu Washingtoniliarluni akerliussutsimik takutitseqataajartortoq, oqarpoq.

275.000-it qimuttuitsorlutik apuupput

Inuit 275.000-it missaat qimuttuitsorlutik Washingtoniliaasimasut nalunaarutigineqarpoq. Arfininngornermi angallattartut nalinginnaasumik amerlassusigisartagaannut naleqqiullugu arfineq-pingasoriaammik amerlanerupput.

Trumpip præsidentitut ippassaq ivertinneqarnissaanut atatillugu qimuttuitsorlutik Washingtoniliartut 193.000-it missaanniissimassangatinneqarput.

Trump amerikamiut ilaannut aalassatsitsinikooqaaq, arnat pillugit, mexicomiut muslimillu pillugit nikassaarpaluttumik nipilimmik oqaaserisimasai aalassassimaarutigineqaqalutik.