Michael Binzerip CV-minik kusassaasimanini utoqqatsissutigigaa

Tele-Postimi Air Greenlandimilu pisortaanerusimasup Michael Binzerip, ilinniarsimanerminut atatillugu paasissutissanik kukkusunik piaaraluni saqqummiussisarsimanini maanna nassuerutigaa.
Allattoq Mads Lynge
novembarip 20-at 2014 10:28

- Paasissutissat ilinniarsimaninnut tunngasut pillugit kukkungaatsiarsimavunga, CV-nnut nalunaarsukkakka "pinnersarsimallugit". Iliuutsit isumakkeerfigineqarsinnaanngitsut, ilumoortulli, Michael Binzer oqarpoq.
Naalakkersuisut siulittaasuata allattoqarfiani sulisup Michael Binzerip ilinniagaqarsimaneranut atatillugu paasissutissanik pissarsiuleruttorfiani Michael Binzer taama nassueruteqarpoq.
 
- Namminersorlutik Oqartussani pissutsit pillugit isertuananga oqaaseqartarsimaninnut attuumassuteqarsinnaanerpa? Mamianartuliat, Kalaallit Nunaannilu politikkikkut pissutsit kingullertigut atuuttut pillugit oqaaserisimasakka tunuliaqutaasimanerpat? Michael Binzer aperivoq.

Sulisussarsiortitsisarfiit arajutsisimavaat
Ilinniarsimanini pillugit paasissutissanik siornatigut aallertoqarsimasinnaanera, taassuma ilanngullugu tikkuartorpaa:
 
- Suliffeqarfiit piukkunnartorsiortut aqqutigalugit atorfinitsinneqartarsimavunga, sulininnilu angusarissaartarsimallunga, tassuunatigut annerusumik isornartorsiorneqarsinnaangilanga, Binzer oqarpoq.

Aamma atuaruk Michael Binzer TELE-POST-imi atorfimminit tunuarpoq

Norgemi najugaqartilluni ujakkaartarnini ukiuni aqqaneq-marlunni pingaarnertut aallussimallugu oqaatigaa. Tamannalu ilaatigut pissutaatillugu assersuutigalugu ilinniarnerminut atatillugu soraarummeernissat ilaannut anngutinngitsoortarsimanerarluni, soorlu aamma aningaasanik aqutsinermut tunngasunik ilinniarnerminut atatillugu ilinniartitsinernut anngussinnaasarsimannginnerartoq.

Aamma atuaruk Michael Binzer Tele-mi pisortanngulerpoq

Taammattorli ilinniarsimanerminut atatillugu paasissutissanik kukkusunik piaaraluni saqqummiussisarsimanini utoqqatsissutigaa:
 
- Kalaallit Nunaanni Danmarkimilu 1999-imili atorfeqarfigisarsimasanni maannamut angusarisarsimasakka pinnagit, ilinniarsimasakka ilinniarsimanngisakkaluunniit aallaavigalugit maanna aatsaat misissuiniartoqalernera immikkut maluginiagassaavoq, Michael Binzer oqarpoq.