Mianersoritsi! Nanoqarporooq

Nanoq arnaviaq piaqqisartoq Niaqornaarsuup eqqaani qeqertami  takuneqarsimasut,  Aalisarnermut, Piniarnermut Nunalerinermullu Naalakkersuisoqarfimmut, ippassaq sapaammi ualikkut nalunaarutigineqarpoq.

Nannut kingullermik takuneqaramik, nannup arnavissap piaqqani ataatsip missaani ukiulik, amaasiarlugu Kangaatsiap eqqaata tungaanut naluttoq takuneqarsimavoq. Inuit pineqartup eqqaanniittut nanoqarsinnaaneranik sissueqquneqarput.

Nannut eqqissisimatitaanerat piniagaaneralu pillugit nalunaarut najoqqutaralugu, arnavissat piaqqisartut eqqissisimatitaalluinnarput.

Takunnittoqassagaluaruni, angallatit umiatsiaaqqalluunniit nannut qaninnguussanngilaat, tassa inunnut qimminulluunniit ulorianartorsiortitsinngippata.

Nannut nerukkarneqassanngillat imaluunniit narasserneqassanngillat. Inuit nannunut qanillattoqquneqanngillat aamma nalunnguarneranni nunamiinneranniluunniit akornusersorneqassanngillat.

Nannut pineqartut takoqqinneqassagaluarpata erngertumik aalisagartassannik nakkutilliisoqarfimmi Niels Laursenimut saaffiginnittoqassaaq oqarasuaat 345000 atorlugu.