Metallicakkut ukiut arfineq-pingasut ingerlareersut saqqummersitseqqilersut

Amerikamiut rockimik nipilersortartut , danskiusumik Lars Ulrichimik tumerparpaartartullit qaammatialuit qaangiuppata saqqummersitseqqittussanngorput.

Kingullermik saqqummersipput 2008-mi, "Death Magnetic", tamatumalu kingorna tusarnaartitsinernit immiussanik arlalinnik aamma saqqummersitsisimalluti.

Metallica aqqanilissaanik saqqummersitsissaaq. Nuusiaat novembarimi saqqummersinneqassaaq taaguutigissallugulu "Hardwired ... To Self-Destruct", Metallica Los Angelesimit ippassaq sisamanngornermi taama nalunaaruteqarpoq.

- Saqqummilerpoq! Nalunngilarput sivisuumik utaqqineqartoq, ullumikkulli tulluusimaarutigalugu tusartissinnaanngorparput, "Hardwired ... To Self-Destruct", nipilersoqatigiit Facebookimi taama allapput.

Parisimi novembarip qaammataani peqqarniisaarniartoqarnerani toqutaasut eqqaaniarlugit Metallica tusarnaartitsinermi immiussanik saqqummersitsivoq.

Immiussat taakku tusarnaartitsisarfimmi Le Bataclan immiussaapput. Tusarnaartitsisarfimmi tassani, Eagles og Death Metalip tusarnaartitsinerani imminut pilliutigitigaluni qaartartumeerisoqarmat inuit 90-it toqutaapput.

Saqqummersitaq taaguuteqarpoq "Liberte, Egalite, Fraternite, Metallica! - Live at Le Bataclan. Paris, France - June 11th, 2003" Frankrigip inuiattut oqarluartaarutaanut "kiffaanngissuseq, naligiinneq peqatigiinnerlu" innersuussutigalugu.

Metallica Los Angelesimi 1981-imi pileqqaarpoq kingornalu nunarsuarmi rockimik nipilersoqatigiit nuannarineqarnerpaat ilagilerlugit nuusiaminnillu millionerpassuarnik tunisaqarsimallutik.

/ritzau/AFP