Meeqqat sumiginnakkat sullinneqarnerusariaqarput
Kalaallit Nunaanni meeqqat sumiginnakkat pillugit suliniarneq pimoorunneqarnerusariaqartoq, danmarkimi poitikerinit oqaatigineqartoq, Kristeligt Dagbladip allaaseraa.
Meeqqat sumiginnakkat salliutinneqarnerunissaat pillugu, Kattuffiit politikerillu namminersornerullutik oqartussanut piumasaqarnerusariaqartut Red Barnet oqarpoq. Taamatut piumasaqarneq aallaaveqarpoq Nuummi meeqqat sumiginnakkat pillugit nalunaarusiap saqqummiunneqarnerata kingorna.
Meeqqat sumiginnakkat pillugit nalunaarusiaq FN-ip meeqqat pillugit immikkoortortqarfianut nassiunneqarpoq, tassanilu nalilerneqassaaq, namminersornerullutik oqartussat meeqqat pisinnaatitaaffii eqquutsinneraat.
- Namminersornerullutik oqartussat suliassartik naammassisinnaanngippassuk ilisimatinneqartariaqarput, Dorrit Hermann, Red Barnet-mi ingerlatsinermik aqutsisoq oqarpoq.
Red Barnet-ip oqariartuutai Christiansborg-mi politikerinit tapersersorneqarpoq. Grønlandsudvalgimi ilaasortaasoq Kim Andersen, venstremeersoq oqarpoq ajornartorsiut qaangerniarlugu Kalaallit Nunaannut paasisimasaqarluartunik ikiuiartortitsisoqarsinnaasoq.
Ilanngullugu aamma oqaatigaa isumaginninnermut tunngasunik ilisimasallit Kalaallit Nunaani meeqqanik sumiginnaasarneq pillugu oqallinnermi ilanngutsinneqartariaqartut.
Kuupik Kleist Inuit Ataqatigiinneersoq oqaaseqarnermini oqarpoq ajornartorsiutit Kalaallit Nunaata iluani aaqqinniagassaasut.
- Nammineerluta akisussaaffigaarput. Ukiuni kingullerni arlaqalersuni meeqqat atugaat pillugit inatsisartuni oqallittarsimaqaagut. Aningaasanullu inatsisissanut 2006-moortumut meeqqat sumiginnakkat pillugit aningaasaliisimalluta, Kuupik Kleist oqarpoq.
