Meeqqat sumiginnakkat pillugit ministeriuneq akuleruteqquneqartoq
Ataatsimut iliuusissanik pilersaarusiorsinnaanerlutik paasiniarlugu, Naalakkersuisut siulittaasuat Kim Kielsen ataatsimiigiaqquneqarnissaanik ministeriuneq qinnuigisimavaat.
Qaasuitsup Kommuniani pissutsinik misissuereerluni Meeqqat Illersuisuata nalunaarusiaa atuareerlugu kajumissaaripput. Tassani atuarneqarsinnaavoq meeqqat sumiginnarneqartut, kaatsitaasarlutik kinguaassiutitigullu atornerlunneqartarlutik.
Aamma atuaruk Aaja: Kalaallit meerartai ikiorniarlugit danskit aningaasaliissagaluarput
Taamaattumik Martin Lidegaardip ministeriuneq Lars Løkke Rasmussen akuleruteqqullugu piumaffigaa. Naak Kalaallit Nunaat namminersulersimagaluartoq, meeqqat danskit passiannik passeqarput, Martin Lidegaard oqarpoq.
- Meeqqat atugaat quarsaarnartorujussuupput uaguttaaq naalagaaffeqatigiinnermi akisussaaqataavugut. Danskit ministeriunerat namminersorlutik oqartussanut assani isaattariaqarpaa oqarluni: Uku ikioqatigiilluta misissuiffigilaartigit aaqqiissutissanillu tamatta illersorsinnaasatsinnik pilersaarusiorluta, Martin Lidegaard DR-imut oqarpoq.
Aamma atuaruk Søren Espersenip siunnersuutaa Martha Lund Olsenip akuerinngilaa
Lars Løkke Rasmussen aamma Naalagaaffeqatigiinnermut ministeriuvoq, taamaattumik ministeriuneq suliamut akulerutissasoq Enhedslistenimeersoq Christian Juhl Socialdemokratineersorlu Karin Gaardsted isumaqarput.
- Isumaqarpunga siunnersuut pitsaassuusoq. Iliuuseqartariaqarpugut, una aallarnisaaneriinnaavoq. Nalunaarusiaq tigummiarparput, allaganngorlugulu takusinnaavarput meeqqat alliartornerminni atukkatik qanoq ajortigisut namminneq oqaasertaleraat, Karin Gaardsted oqarpoq.
Dansk Folkepartiimeersup Søren Espersenip ippassaq oqallinnermik aallartitsisoq, ataatsimeeqatigiinnikkuinnaq aaqqiisoqarnavianngitsoq isumaqarpoq. Danskit naalakkersuisuisa akisussaaffik tigusariaqaraat, naggataagullu Kalaallit Nunaanni meeqqanut oqartussaaffik tiguvillugu, taanna isumaqarpoq.
