Meeqqat sumiginnakkat iliuuseqarfigineqalerput

Meeqqat sumiginnarneqartarneri pisortanit isiginngitsuusaarneqartarnerat pillugu akerliussutsimik takutitsoqarnerani, paasititsiniaanissamik Agathe Fontainip IA-meersup siunnersuutaa piviusunngussagunavippoq, naalakkersuisut aningaasaliinissaminnut piumassuseqarluarmata.

meeqqat angerlarsimaffiup avataanut inissinneqartartut angajoqqaarsiaasa Nuummi peqatigiiffiata aaqqisugaanik akerliussutsimik takutitsineq inunnit 80-t missaaniittut peqataaffigaat. Akerliussutsimik takutitsisut allagartarsualisaarlutik ilaqutariinnermut pisortaqarfiup silataanit inatsisartut ataatsimiittarfiata tungaanut ingerlaarput.

- ullut tamangajaasa meeqqat sumiginnagaasartut tusagassiutini tusartarpagut, akerlioqatiginiartigut, suleqatiginiartigut.

Oqaatsit tamakkua nuummi ullumikkut akerliussutsimik takutitsisunit ilaatigut oqaatigineqarput.

Ilaqutariinnermut Naalakkersuisoq Tommy Marø oqarpoq meeqqat sumiginnangaasartut pillugit iliuuseqartoqalersoq.

- Ataasinngorpat inatsisartuni oqaluuserinissaani isumaliuutissiissummi partiit tamarmik atsioqataaffigisaani, paasisitsiniaaneq aammalu oqallinnerit ukioq manna aallarteriissasut. Maannakkut ilungersorluta aningaasanik nassaarniarnerput pimoorullugu ingerlapparput, Tommy Marø oqarpoq nangillunilu; - Aningaasat nassaarisinnaanngikkutsigit aningaasaqarnermut ataatsimiisitaliamut aningaasat qinnutigissavagut, taanna suliniut ukioq manna aallartereertariaqarmat. Tommy Marø naggasiivoq.

Angajoqqaat angajoqqaanngorlaallu siunnersorneqartarfiat ilaqutariit højskoliannik taasaq, kommunini arlalinni atuutsinneqartoq, nunatsinni siaruarnerunissaa ilaqutariinnermut naalakkersuisup aamma sulissutiginiagaasa ilagaat.