Canada Meeqqat qitornavissianngortinneqarsimasut taarsiivigineqartussanngorput
Piffissami 1965-imit 1984-imut, Sixties Scoopimik taagorneqartumi - 60-ikkunni katersorneqartut - inuit, indianerit métisillu qitornaat tuusintillit angerlarsimaffimminnit arsaagaallutik qitornavissianngortinneqarput, oqartussat isumaqarmata ilaqutariit angajoqqaatut pisussaaffimmik naammassisaqarsinnaanngitsut. Meeqqalli qasserpiaat pineqarnersut ilisimaqqissaarneqanngilaq.
Meeqqat nunap inoqqaaviunngitsuni inissinneqartarsimapput, oqaatsitillu kulturertillu annaasimallugit, aamma allaanerusutut isigineqarlutik qinngasaartittarsimapput. Tamannalu kingorna atornerluisuunermik ajornartorsiutinik annertuunik kinguneqarsimavoq qitornavissianngortinneqartullu ilarpassui aamma kingorna imminnut toqussimapput.
Indianerit høvdingiata arnap inuusuttup, Marcia Brown Martelip, taamatut iliortoqarsimanera akuerineqarsinnaanngilluinnartut isigalugu Canadami naalakkersuisut eqqartuussisutigoortumik suliassanngortissimavai.
Suliarlu taanna ukiorpassuarni ingerlavoq, Canadamili avannaani pissutsinut naalakkersuisup Carolyn Bennettip høvding Brown peqatigalugu tallimanngormat ullaakkut nalunaarutigaa Canadami naalakkersuisut qitornavissianngortinneqartunut suli inuusunut 3,8 milliardit koruunit missaannik taarsiissuteqarniartut.
Taamaalillutik tamarmik immikkut millionip pingasorarterutaata affaatalu akornanni taarsiivigineqartussanngorput.
Naalakkersuisut aamma saammaateqatigiinnissaq pillugu aningaasaateqarfimmut, suli inuusut oqaatsiminnik kulturiminnillu atueqqilernissaannik ikiuisussamut 252 millionit koruuninik akiliuteqarniarput.
Marcia Brown Martelip tusagassiorfinnut oqaatigaa nunap inoqqaavisa qitornaannik tilligarneq, oqaatsiminnillu, kulturiminnik imminnullu naleqassutsimik misigisimanermik annaasaqaatigisaminnik ilaqutariinnut allanut tunniunneqartarnerat nunarsuarmi sumiluunniit maanna akuerineqarsinnaanngitsoq.
Matumani aalajangiineq kingorna taamatut pisoqaqqinnginnissaanut neriuuteqalersippaatigut, høvding Brown taama naggasiivoq.
