Kujataani: Meeqqat qinngasaaruttarnerat ajornartorsiutaasoq

Kujataani meeqqat akornanni qinngasaarisarneq nakkarsaasarnerlu ajornartorsiutaasorujussuusoq, Meeqqat Illersuisuata Kujataani meeqqat atugarisaat pillugit nalunaarusiornermini tikkuagaasa ilagaat. Qinngasaarisarnerlumi ajornartorsiutaajuartuusoq, Nanortallip Atuarfiani pisortap uppernarsarpaa.
marsip 22-at 2017 05:48

Kujataani meeqqat akornanni qinngasaarisoqartaqisoq Meeqqat Illersuisuanit maluginiarneqarpoq. Tamannalu kinguneqarnerluttarpoq.

- Qinngasaarisarneq, nakkarsaasarneq meeqqat akornanni ajornartorsiutaasorujussuusoq  ajoraluartumik. Meeraqarpoq atuariartornissamut ersisartut, qunusartut, Meeqqat Illersuisuat  Aviâja Egede Lynge oqarpoq.

Nanortallip Atuarfiani aamma meeqqat akornanni qinngasaarisoqartarnera ajornartorsiutaasoq,  atuarfiup pisortaa Mari S. Abelsen oqarpoq.

- Atuarfinni allanisullu maani Nanortallip Atuarfiani ajornartorsiutigisarparput ulluinnarni qinngasaarisoqartarnera. Taamaamat arlaatigut iliuuseqartuarpugut annikillisarniarlugu, Nanortallip Atuarfiata pisortaa Mari S. Abelsen oqarpoq.

Allaat meeqqat atisaat nakkarsaanermi qinngasaarutigineqartarput. 

- Atisat, imaluunniit arlaanik atugaqarsimagaanni sakkortoorujussuarmik nakkarsaasarneq pineqarpoq. Tassanilu saqqummiinitsinni ilanngupparput eqqaamaneqartariaqartoq una tarnikkut innarliinerugami,  Aviâja Egede Lynge oqarpoq.