Meeqqat pillugit suliniaqatigiit kattuttut
Kattuffiit Meeqqat pillugit suliniutillit arfineq-pingasut kattuffimmik ataatsimoorfigisinnaasaminnik pilersitsipput, taannalu taaguuserpaat Meqqanik Sullissisut Peqatigiit. Taakku Nunatsinni meeqqat inuusuttullu atugaat pillugit qaammarsaaneq suleqatigiissutigissavaat.
- Kalaallit Nunaanni suliniaqatigiit naalakkersuinikkut attuumassuteqanngitsut arfineq-pingasuvugut, tamattalu meeqqat atugaannik pisinnaatitaaffiinillu assigiinngitsunik pingaartitsilluta suliniuteqartuulluta. Meeqqanik Sullissisut Peqatigiit pilersinneratigut immitsinnut tapersersoqatigiissinnaavugut, nalunagu sorliup suna suliniutigineraa, taamaasillutalu suliat ingerlareersut assinganik aallartitsinissaq pinngitsoorsinnaallutigu, Ruth Montgomery-Andersen oqarpoq.
Suleqatigiinneq pitsaasoq
Nuna tamakkerlugu katersuiniarnermi IGGU 2014-imi 1 million koruunit katersorneqarput, tamannalu meeqqanik sullissisut kattunneratigut aatsaat iluatsissinnaasimasoq oqaatigineqarpoq.
- Assersuutigalugu katersuiniarneq qanittumi pisoq iluatsilluartoq, taama iluatsilluartigisimanavianngikkaluarpoq meeqqat pillugit suliniaqatigiiffik ataasiinnaq katersuiniarsimagaluarpat, Ruth Montgomery-Andersen KNR-imut taama oqarpoq.
Meeqqat kiserliunnginnissaat anguniarlugu suliassaq suli annertusoq, Meeqqanik Sullissisut Peqatigiit isumaqarput.
Suliniaqatigiiffiit kattuttut tassaapput: MIO, Foreningen Grønlandske Børn, INUA - Kalaallit Røde Korsiat, Inooqat, Sorlak, Red Barnet, Nanu børn kiisalu Meeqqat Inuunerissut.