Meeqqat pillugit isumaqatigiissummut misissueqqissaarneq saqqummiunniaraa
Naalakkersuisut tusagassiortunik ukiaanerani marlunngornikkut katersortitsisarnissaannut Martha Lund Olsenip katersortitsinera siulliuvoq, meeqqallu pillugit suliniutit tassani sammineqassapput.
Naalagaaffiit Peqatigiit meeqqat pillugit isumaqatigiissutaata Nunatsinni pissutsinut tullursarnissaanut suliamut misissueqqissaarneq, Martha Lund Olsenip saqqummiutissavaa.
Meeqqat atugarisaat qaammatini kingullerni sammineqartupilussuupput. Tunumi isumaginninnermut suliat amerlasoorujussuusut, Naalagaaffiit Peqatigiillu meeqqat pillugit isumaqatigiissutaat malinneqanngitsoq isumaginninnermut naalakkersuisoqarfiup Meeqqat Illersuisuatalu aasap ingerlanerani nalunaarusiaasa takutippaat.
Meeqqat pisariaqartitaat atugaallu qulakkeerniarlugit siunissaq ungasinnerusumut isigisumik pilersaarusiortoqarnissaa kissaatigalugu, Meeqqat Illersuisuata, Aviâja Egede Lyngep sapaatip akunnerani kingulliup tulliani nalunaarutigaa.
Tusagassiortunik katersortitsinermi suut saqqummiunneqarnersut pillugit marlunut tusagassiiumaarpugut.
