Assi: KNR

Olsvig: Meeqqat pillugit inatsisitaassaq oqilisaataassaaq

Kommunit meeqqat sumiginnarneqarsimasut pillugit iliuuseqajaartalerpata, isumaginninnermi suliassat siunissami aamma ikilisinnaasut, isumaginninnermut naalakkersuisup ilimagaa.

Meeqqat pillugit inatsit nutaaq Inatsisartuni siullermeerlugu sisamanngornermi oqallisigineqarpoq. Kommunit meeqqat atugaat pillugit iliuuseqajaartarnissaat inatsimmi qulakkeerneqassaaq.

Meeqqat Illersuisuata meeqqanut iliuuseqarniarneq nuannaarutigaa, iluaqutaannngitsoornissaali ernummatigalugu, kommunit inatsimmik naammassinnissinnaanngereermata.

AAMMA ATUARUK Meeqqat pillugit inatsisitaassaq nuannaarutigalugulu ernumanartoqartikkaa

Inatsisikkulli nutaakkut kommunit akisussaaffimmik naammassiuminartinnerulissagaat suunerilu paasiumiartinnerulerlugit, isumaginninnermut naalakkersuisoq isumaqarpoq.

- Angajoqqaanut aamma erseqqinnerulertussaavoq sunarpiaq akisussaaffiginerlugu, aamma eqqarsaatigalugu angajoqqaarsiaqartarnermi erseqqinnerusumik maleruagassaqarnissaq tassani suliarisussaagatsigu, kommuninit ajunngitsumik suliarineqalerpata aamma oqilisaataaqataasussaavoq meeqqanik isumaginninnermi.

AAMMA ATUARUK Inatsisissaq kinguartinneqarli

Kommunillu inatsit tunngavigalugu siusissukkut iliuuseqartalerpata, kommunit siunissami suliassaat ikilisinnaasut, isumaginninnermut naalakkersuisoq Sara Olsvig oqarpoq. 

Meeqqalli Illersuisuata Aviâja Egede Lyngep oqaatigaa kommunit Naalagaaffiit Peqatigiit meeqqat pillugit isumaqatigiissutaannik naammassinnissinnaanngitsut. Sulisukinnertillu pissutigalugu inatsit nutaaq piviusunngortissallugu artorsaatigisinnaagaat, illersuisoq ernumavoq.

Taamaammat Namminersorlutik Oqartussat kommuninut ikorfartuinissaat taassuma neriuutigaa.

AAMMA ATUARUK Ulloq unnuarlu paaqqinnittarfinnut inissiisarneq sukateriffigineqalerpoq

Naalakkersuisulli isumaginninnermut aqutsisoqarfik pilersinneqaqqamertoq aqqutigalugu kommuninik maannamit tapersersuinerulissasut, Sara Olsvig isumaqarpoq.

- Taassumalu aqutsisoqarfiup kommuninik ikorfartuinissaq suliassarivaa kommunillu peqatigalugit suleriusissanik periutsinillu nutaanik ujartuinissaq. Taamaalilluta naalakkersuisuniit kommuninik ikorfartuinerput annertusarniarlutigu aamma suliariniaratsigu. Inatsisillu taannartaa aamma ataqatigiittussaavoq, isumaginninnermut naalakkersuisoq Sara Olsvig taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!