Meeqqat pillugit inatsisitaassaq nuannaarutigalugulu ernumanartoqartikkaa
Inatsit 2014-miilli suliarineqalersoq akuerineqanngitsoortarlunilu kinguartinneqartarsimavoq. Ilaqutariinnermulli naalakkersuisup Inatsisartuni siullermeerlugu oqallisigineqarnissaanut aqagu saqqummiutissavaa. Meeqqat illersuisuata tamanna nuannaarutigaa, aammali piviusunngortinneqarpat kommunet artorsareertut qaavatigut suliakkerneqarnissaat ernummatigaa.
Meeqqat ilaat angajoqqaarsiartaaminnit sumiginnarneqartartut, MIO-p misissuinerminni paasisaasa ilagaat. Angajoqqaarsiammi nakkutigineqarnissaannut inatsimmik ulloq manna tikillugu maleruagassaqanngilaq. Inatsisilli nutaap atuutilerneratigut, angajoqqaarsianut nakkutilliisoqartalissaaq.
- Angerlarsimaffiup avataanut inissinneqarnermini ajoraluarmik ilaatigut misigisaqarsinnaasarput aamma qaavatugut aamma sumiginnaanermik. Tassa taanna avaqqunniarlugu nakkutilliineq annertuneq uani pisinnaanissaa nuannaarutigivarput.
AAMMA ATUARUK Naalakkersuisut haster lov om støtte til børn igennem
Meeqqanut inuusuttunullu immikkut pisariaqartitsisunut inatsisissap arlaleriaqaluni inatsisartuni ingerlaqqinngitsoortartup, meeqqat illersuisuata ataasiarani tusarniaassutigineqarnerani isornartorsiuteqarfigisarpaa. Maannalu inatsisissatut siunnersuut naammagisimaarpaa.
Siumoortumik taavalu aamma ujartuilluni akuliulluni meeqqat atugaanik misissuisarnissaq ersarinnerulerpoq. taamaalilluni siusinnerusukkut iliuseqarnissamut ilaqutariinnullu aamma tapersiinissamut aamma periarfissat annertusissalluni.
AAMMA ATUARUK Ulloq unnuarlu paaqqinnittarfinnut inissiisarneq sukateriffigineqalerpoq
Naak Naalagaaffiit Peqatigiit meeqqat pillugit isumaqatigiissutaat nunatsinni atuutereeraluartoq, nakkutilliinerit MIO-llu nalunaarusiai aallaavigalugit, ajornartorsiutit imaaginnavipput. Inatsisissap piulerneratigut tamanna qulakkeerinninnerunersoq Meeqqat illersuisuata ernumanartoqartippaa.
- Nalunngereerparput kommunit amerlanerpaat Naalagaaffiip Peqatigiit Meeqqat pillugit isumaqatigiissutaanut malinninniarnerat ajornartorsiutaasorujussuusoq. Taamaammat inatsit una siunertaa pitsassuugaluartut aamma piviusunngortinniarnera oqimaasinnaanera ernumassutigivara, Meeqqat illersuisuat, Aviaja Egede Lynge, taama oqarpoq.
