Nakkutilliineq: Meeqqat misissorneqaqqaarsimanngitsunik ilaqutarsiaqalertartut
Isumaginninnermut Naalakkersuisoqarfiup Kommuneqarfik Sermersuup inunnik isumaginnittoqarfiani nakkutilliinerminni taama inerniliipput.
Inuk meeqqamut 15-it inorlugit ukiulimmut kinguaassiutitigut kanngutsaatsuliorsimanermut eqqartuunneqarnikuunersoq, meeqqanut pinerliisimannginnermut uppernarsaatip takutittarpaa. Kommunip meeqqat ilaqutarsianiitilinnginneranni paarsisussat meeqqanut pinerliisimannginnermut uppernarsaammik pissarsiviginissai inatsisitigut pisussaaffigaa.
AAMMA ATUARUK Sermersuumi meeqqat pisortanit sumiginnagaapput
Nuummili angerlarsimaffiup avataanut inissiiffigineqarsimasuni amerlasuuni meeqqanut pinerliisimannginnermut uppernarsaatit nassaassaanngillat. Nakkutilliisullu taakkuninga apeqquteqarneranni isumaginnittoqarfiup uppernarsaatit nassaarisinnaaneq ajorpaat.
Meeqqanulli pinerliisimannginnermut uppernarsaatit piffissap ingerlanerani pissarsiarineqarnissaat nakkutilliisut nalilerpaat. Taamaakkaluartorli meeqqat ilaqutarsianiilereersimaneranni aatsaat taamaaliortoqassaaq.
- ingerlatsinikkut peqqissaannginneq nalorninerlu pissutigalugit (…), pineqartup piumasaqartoqartillugu uppernarsinissaata periarfissaqarnissaa qularnaarneqarsimanngilaq, nakkutilliisut nalunaarusiaanni allassimavoq.