Meeqqat inuusuttullu suaarutaat nipilersukkamik videoliornermi sammitinneqarusuttut
Isumaginninnermut, ilaqutariinnermut, naligiissitaanermut inatsisinillu atuutsitsinermut naalakkersuisoq, Sara Olsvig, Naalagaaffiit Peqatigiit meeqqat pillugit isumaqatigiissutaata novembarip ulluisa 20-anni ullorsiornissaat aallartisarlugu nipilersukkamik videomik saqqummiussivoq.
Video Maasi Pedersenimit, Josef Tarrammit Peter Lyberthimiillu suliarineqartoq, meeqqat inuusuttullu toqqissisimarusullutik oqaraangamik inersimasunit tusarnaarneqarusuttarnerannut tunngavoq.
Naalakkersuisoq Sara Olsvig ima oqaaseqarpoq:
- Taamaaliortariaqarpugut, tamanna akisussaaffik qimarratigissannginnatsigu. Phillip nipilersukkamini ersarissumik oqariartuuteqarpoq, soorlu aamma Maasi inuusukkallarami taamaaliorsimasoq. Ullumikkut nipilersugaq nutaaq saqqummerpoq, Maasip oqaluttuuteqqippaatigut, qanoq tusarnaarnissap qanorlu iliuuseqarnissap pingaaruteqartiginera, Naalakkersuisoq Sara Olsvig taama oqaaseqarpoq.
Nipilersukkamik videoliaq uani takusinnaavat: Ullorissat
Maasi: Nipilersukkap meeraq ataasiinnarluunniit inersimasumik ikiortissarsiortissinnaappagu
Maasi Pedersenip suliami inuiaqatigiinnut pingaarutilimmik oqariartuutilimmi naalakkersuisoq suleqatigisinnaammagu nuannaarutigaa.
- Naggataani uagut inersimasut angajoqqaallu meeqqanut akisussaaffik annertooq tigummissagipput pingaaruteqarpoq, uagullu suaaruteqartussaasugut. Nipilersukkap meeraq ataasiinnarlunniit inersimasumik ikiortissarsiortissinnaappagu nipilersukkap anguniakkani angusimassavaa, Maasi Pedersen oqarpoq.
Video Nuuk Centerimi tallimanngornermi novembarip ulluisa 17-ianni saqqummiunneqarpoq, ilaatigullu Naalakkersuisut facebookkikkut qupperneranni takuneqarsinnaalluni.
