Politikki

VIDEO Meeqqat inuusuttullu ikiaroornartumik atornerluinerat eqqummaariffigineqarpoq

Innuttaasup meeqqat quliniit aqqaneq marlunnut ukiullit ikiaroornartumik atuisut Qaqortumi naammattoormagit tupaallannanngilaq. Ajornartorsiummi kommunimit nunalu tamakkerlugu ilisimaneqarpoq.

Allattoq Sika Frederiksen, Nûno Isbosethsen

juulip 10-at 2015 15:22

Sukisaarsaarfimmi meeqqat ornittagaanni pisortap Julius Flyp tamanna uppernarsarpaa.

- Takussaasarpoq aamma malunnarsisarpoq. Qujanartumik angajoqqaat suleqatiginnittarput taamatut suleqatiserineqarnertik tunngavigalugu.

- Kisiannili soorunami ataasiakkaaqarpoq tikikkuminaatsunik angajoqqaanik. Nalunngisagullu tunngavigalugit tassaniinnerupput artornartortaa, Julius Fly meeqqat ornittagaanni pisortaq KNR-imut oqarpoq.

Aamma atuaruk VIDEO Meeqqat quliniit 12-it missaannik ukiullit ikiaroortut naammattoorneqarput

Angerlarsimaffiup avataanut inissiigallartarneq

Kommune Kujallermi ajornartorsiut qanoq iliuuseqarfiginiarneqartarpoq.

- Angajoqqaat imminermineerlutik tigimminnissinnaanngippata akisussaaffimmik arlaatigut ajornartorsiuteqarnertik tunngavigalugu taava kommuni qanoq iliuusissarsiortarpoq.

- Ilaatigut allaat pisariaqarsinnaasarpoq angerlarsimaffiip avataani inissiigallariaqartarnermik, Kommune Kujallermi inunnik isumaginninnermut ataatsimiititaliami siulittaasoq Stine Egede Nørbek KNR-imut oqarpoq.

Aamma atuaruk Meeqqat Illersuisuata meeqqat hashimik atuinerat kamaatigaa

Meeqqat 5.000-it sumiginnakkat

Nunatsinni meeqqat pingasuugaangata ataaseq angajoqqaaminit sumiginnagaasimasartuusoq misissuinerup takutippaa. Taamaammat angajoqqaat ilaat akisussaaffimmik tigusisinnaasannginnerat ilisimaneqarluni.

Tassa meeqqat 5.000-it tikillugit amerlassusillit kommuninit isumagineqartariaqarput angajoqqaaminnit paarineqannginnamik, Meeqqat Illersuisuat Aviâja Egede Lynge oqarpoq, taassumalu ilisimasamik katersinissaq pisariaqartoq aamma oqaatigaa.

- Siunissami pisariaqartilluinnarparput makkua kisitsisinngornissaat taavalu piviusut qanorlu ajornartorsiut angitiginersoq misissorneqartariaqassaaq taavalu tassanngaanniit iliuuseqartoqartariaqarluni.

- Kisianni ajornartorsiut isigereerparput taamaammat aamma utaqqiinnarsinnaanngilagut takussutissanik nutaanik takkuttoqaqqinnissaa. Taamaammat eqqumaffigisariaqarparput una inuiaqatigiittut, Aviâja Lynge Egede oqarpoq.