Meeqqat illersuisuat: Nalunaaruteqartarneq toqqissisimanarnerulersinneqarli

Meeqqat isumannaatsumi inuunissaq, illersorneqarnissaq ikiorneqarnissarlu pisinnaatitaaffigigaat, MIO-p tusagassiuutinut nalunaarummi oqaatigaa, meeqqanullu tunngatillugu isumaalukkaanni nalunaarusiortarnissaq taamaammat kissaatiginarnerpaasoq aamma oqaatigalugu.

- Assersuutigalugu qisuariaatigineqartariaqarput kinguaassiutitigut kanngutsaatsuliornernik paarsinerlunnernillu pasitsaassinerit, tamakku inatsisitigut inerteqqutaanerat piinnarnagu kisiannili peqqutigalugu inersimasutut akisussaaffigigatsigu qulakkiissallugu meeqqat isumannaatsumik toqqissisimallutik inuunissaat, illersorneqarnissaat ikiorneqarnissaallu, MIO taama ilaatigut allaaserisaqarpoq, nangillunilu:

AAMMA ATUARUK Nunaqarfinni innuttaasut meeqqat atugaannut aaqqeerusussuseqarput

- Piviusorli tassaavoq sumiiffinni mikisuni inukitsunilu inuugatta, tamatta immitsinnut ilisarisimalluta ilaqutariillutaluunniit. Tamatuma malitsigisaanik sumiiffinni mikisuni inuusut akunnerminni imminnut pisariaqartinnertik peqqutigalugu pissuserilernikuuaat namminerluinnaq pigisanik inatsiseqalerneq ileqqoqalernerlu, MIO oqarpoq, meeqqanullu kanngutsaatsuliornerit nalunngikkaluarlugit iliuuseqarfigineqartannginnerat ajornerusoq tikkuartorlugu.

Meeqqat pillugit taakkulu illoqarfeeqqani nunaqarfinnilu inooqatit ileqquliussallu inuuffigisat eqqarsaatigalugit isertortumik ersinanilu nalunaarutiginniffiusinnaasunik pilersitsisoqartariaqartoq MIO isumaqarpoq.

AAMMA ATUARUK Meeqqat Illersuisuat: Meeqqat pisinnaatitaaffii unioqqutinneqarput