Meeqqat Illersuisuat: Meeqqat pisinnaatitaaffii unioqqutinneqarput

Qaasuitsup Kommunia meeqqat pisinnaatitaaffiinik unioqqutitsivoq.
Allattoq Mads Lynge
septembarip 04-at 2015 17:48

Meeqqat Illersuisuat Aviâja Egede Lynge, meeqqanullu siunnersorti Ellen Bang Bourup Avannaani illoqarfinni nunaqarfinnilu 18-ini tikeraareerlutik taama inerniliipput:

- Qaasuitsup Kommuniani meeqqanut atugassarititaasut assigiinngitsorujussuupput. Taassuma saniatigut Naalagaaffiit Peqatigiit Meeqqat pillugit Isumaqatigiissutaannik toqqaannartumik unioqqutitsineq nalinginnaasumik takuarput. MIO-mit maluginiarneqarpoq, taamatut unioqqutitsinerit nunaqarfimmiit nunaqarfimmut assigiinngitsorujussuusut, Meeqqat Illersuisuat Aviâja Egede Lynge oqarpoq.

Meeqqat pisinnaatitaaffii atugaallu pillugit paasissutissiilluni ataatsimiisitsisoqarlunilu oqaloqatigiittoqarpoq, meeqqanik, inuussuttunik, inersimasunik utoqqarnillu periutsit assigiinngitsut atorlugit ataatsimiisitsisoqarluni:

- Tikitatsinni tamani tikinnerput nuannaarutigineqarpoq kiisalu ilinniartitseriaaserput, siunnersueriaaserput aqqutissiuusseriaaserpullu immikkut ittumik qujamasutigineqarlutik piffinni inuuniarnikkut atugassarititanut kulturimillu ataqqinnittumik paasinnittumillu pisarmat, Meeqqat Illersuisuat ilaatigut oqarpoq.

Nunaqarfiit MIO-p 2016-imi iluuseqarfigisassaannut ilaassasut, Meeqqat Illersuisuata aamma nalunaarutigaa.