Meeqqat illersuisuat: Ajornartorsiutit ammasumik oqallisigisigit

Taasiilami Kuummiunilu meeqqat naammaginartumik ikiorneqaratillu illersorneqanngillat, MIO nalunaarusiamini naliliivoq.

Sumiginnaanerup, ersiortitsisarnerup kinguaassiutitigullu kanngutsaatsuliortarnerup kingunipilui Tasiilami Kuummiunilu malunnarput.

Aamma atuaruk Aviâja E. Lynge: Meeqqat pisinnaatitaaffii unioqqutinneqarput

Tamanna meeqqat pisinnaatitaaffii pillugit sullissiviup angalanermini arajutsinngilaa.
Tassami meeqqat inuusuttullu oqariartuutaat allannikkut titartaanikkullu tusarniarneqarnerini meeqqat inuusuttullu artorsaateqarneri arajutsisassaanngillat.

- Anaanaga ataatagalu aalakooraangata sumukarfissaaruttarpunga, meeqqat ilaat allappoq.
- Imminut toqukkusullunga eqqarsartarpunga, meeqqat ilaat aamma allappoq.

Ajornartorsiutit ataatsimoorullugit qaangerneqassapput

MIO-p angalanermini maluginialaasa ilagaat innuttaasut naammatsissimasut iliuuseqartoqarnissaanillu kissaateqartut. MIO-p aamma allaaseraa ajornartorsiutinik aaqqiiniarnermi innuttaasut peqataatinneqarnissaminnik kissaateqartut.

Taamaammat meeqqat illersuisuata atorfilitta politikerillu oqaloqatiseriniarpai. Illersuisummi oqariartuutiginiarpaa meeqqanut atugassarititaasut pitsanngorsarniarnerini innuttaasut inuusaasiat aallaavigalugu naligiimmik peqataatitsinikkut pitsaasumik angusaqartoqarsinnaasoq.
Ajornartorsiutilli taakkartorneqartut qaangerneqassappata innuttaasut soqutiginnillutik peqataasariaqartut meeqqat illersuisuat isumaqarpoq.

- Kikkut tamarmik akisussaaffimmik tigusisariaqarput oqallinnermilu peqataallutik, meeqqat illersuisuat innuttaasut toqqorteratik ammasumik oqallinnissaannik kaammattuisoq, nalunaarummi allappoq.

Nalunaarusiaq tamaat allaaserisat ataani kakkiunnikoq atuarneqarsinnaavoq. Ajoraluartumik qallunaatuinnaq saqqummersimasoq kalaallisoortaali suliarineqaleruttortoq MIO-p oqaatigaa.