Meeqqat atuarfiat isumakuluutigaa
Ullutsinnilu meeqqat atuarfiini naammassisartut qiviaraanni, ingerlariaqqinnissamut piumasaqaataasunut nammassinninngitsut amerlavallaartut Aviaja Egede Lynge takusinnaallugu oqarpoq.
Aperaarpullu meeqqat atuarfiini tuluttut qallunaatullu ilinniartitaaneq qanoq isumaqarfigineqaraa.
- Meeqqat atuarfiannit ingerlariaqqissagaanni, ilinniarfeqarfinni tuluttut qallunaatullu ilisimasaqarnissaq piumasaqaataavoq. Tassanilu Nunatsinni meeqqat atuarfiini angusat qiviassagaanni piumasaqaatinut naapertuutinngillat, Aviaja Egede Lynge radio aviisimut oqarpoq.
Taanna isumaqarpoq Nunatsinni qallunaatut tuluttullu ilinniartitaaneq annikippallaartoq.
Anguniakkat angusallu imminnut naapertuutinngillat
Meeqqat atuarfiini atuartut oqaatsitigut piareersartariaqarnerisa saniatigut piorsarsimassutsikkut aamma piareersartoqartariaqartoq Aviaja Egede Lynge isumaqarpoq. Aamma isumaqarpoq Nunatta politikkeriisa anguniagaat kiisalu meeqqat atuarfiini angusat imminnut naapertuutinngitsut.
- Ilinniaqqiffiit qallunaatut ingerlapput, qallunaat ilinniartitseriaasiat ilaalu ilanngullugit. Tamakku meeqqatta piareersimaffiginngikkunikkit politikkerillu oqalullutik meeqqat ilinniagaqarnerulissasut, uanga isinni ataqatigiinngillat, Aviaja Egede Lynge taama oqarpoq.
Taassuma kalaallisut oqaatsivut pingaartippai, taamatulli oqaatsit allat aamma pingaartillugit.
- Apeqqut unaassanngilaq qallunaatut imaluunniit kalaallisut. Uanga Nunarput arlalinnik oqaaseqarfiusussatut isigaara. Ataasiinnarmik samminnippallaarneq ajoraluartumik nammaqatigiitsitsinngilaq, Aviaja Egede Lynge taama isumaqarpoq.
Atuarfitsialak naammassineqanngitsoq
Taassuma atuarfitsialaap tunngaviusumik isumaa torragaa, tassaasoq meeqqap killiffia piginnaasaalu aallaavigalugu ilinniartinneqassasoq, taamaattorli meeqqat atuarfiini tamanna naammassineqanngitsoq isumaqarpoq.
Namminermi meeqqani tuluttut ilinniarnissaa sulissutigisariaqarpaa, piffissallu ilaani qallunaatut oqaloqatigisarlugu, ingerlariaqqinnissamut piareersimanissaa kissaatigigamiuk.
2010-mi inuusuttut meeqqat atuarfianni ingerlariaqqinngitsut 67 procentiusimapput
Ilinniartitaanermut naalakkeruisoq Nivi olsen Radio aviisimit oqaaseqartinniarlugu pissarsiariniassavarput.