Meeqqanut tunngasunik nalunaarutiginninnerit amerlisut
Kommunimut nalunaaruteqarsinnaanerup ajornannginnerulernera ullumimiit atuutilerpoq, nalunaaruteqartartulli qaffanneri ulluni 14-ini kingullerni malugineqarsinnaalereersimavoq.
- Kalerriuterpassuanik, allatigut tigusimassanngisaraluatsinnik tigusaqarluaqaagut, Qaasuitsup kommuniani isumaginninnermut pisortaq Henrik Sóloy KNR-imut oqarpoq.
Sapaatit akunnerini marlunni kingullerni saaffiginninnerit amerlisimapput. Siullermit, qitiusumik nalunaaruteqartarfik pilersinneqannginnerani sapaatip akunneranut tallimaannaasarsimasut maannakkut 15-inik tigusaqartarpugut.
Aamma atuaruk Qaasuitsumi meeqqanut suliniutit Meeqqat oqaaseqartartuata tapersersorpai
Meeqqat kinguaassiutitigut kanngutsaatsuliorfigineqarsimasutut pasigaanni kommunimut nalunaaruteqarsinnaanerup ajornannginnerulernerata, nalunaaruteqartartut amerlinerinut peqqutaasoq, isumaginninnermut pisortaq isumaqarpoq.
Pappialarsorpallaarunnaarput
Siullermimmi pappialarpassuit immersoqqaarneqartussaasarmata.
- Pappialarsornerujussuusimavormi, immersugassallu taakku suli kommunip iluani atorneqarput. Imaaliorpugullu, kinaassutsimik isertuussilluni mailikkut allagaqarsinnaapput tassangaanniillu uagut suliaq ingerlatilissavarput, isumaginninnermut pisortaq oqarpoq.
Meeqqat oqaaseqartartuata isornartorsiorpai
Meeqqat oqaaseqartartuata Aviâja Egede Lyngep Qaasuitsup Kommunia meeqqat pisinnaatitaaffiinik unioqqutitsinerarlugu septemberimi isornartorsiorpaa.
Nunatta avannaani illoqarfinni nunaqarfinnilu 18-ini angalareernerani tamanna pivoq.
Suliniulli nutaaq isornartorsiorneqarnermut qisuariarnerinnartut isigineqassanngilaq.
Aamma atuaruk Meeqqat Illersuisuat: Meeqqat pisinnaatitaaffii unioqqutinneqarput
- Ukiut ingerlanerini nunaqarfinni nalunaarutiginnissinnaaneq ajornarsimasoq takusinnaasimavarput. Meeqqallu oqaaseqartartuata tamanna aamma oqaatigimmagu aaqqiissutissanik misileraalersimavugut, Henrik Sóloy KNR-imut oqarpoq.
Kommunip iliuuseqapallannissaa pisariaqartinneqaraangat, nalunaaruteqartoqarneraniit akunnerit 24-t qaangiutinnginnerani tamanna pisassaaq.
Meeqqat naammattumik nerisassaqarsimannginnerani kommuni iliuuseqapallassimavoq.
Aamma atuaruk Meeqqat Illersuisuata isornartorsiuinera akuerinngikkaat
Taamaammat siunissami kommunimi meeraaneq ajunnginnerulissasoq, Henrik Sóloy isumaqarpoq.
- Qaasuitsup kommuniani meeqqanut immikkoortortaqarfik 2016-imi uummarissarneqangaatsiassaaq immikkullu aallunneqassalluni. Tamannalu aaqqissuussisseqqinnermik iliuusissamillu pilersaaruteqarnermut ilavoq, Henrik Sóloy naggasiivoq.