Meeqqanik siuarsaanissaq siunertaralugu ataatsimeersuartut

Meeqqat atuarfiini atuartut ilisimalluakkatik tassa oqarasuaatit angallattakkat qarasaasiallu atorlugit oqaatigisaqarsinnaanerulernissaanut periarfissat ineriartortinnissaannut ataatsimeersuarneq ullaap tungaa nalunaaqutaq qulinut aallartippoq.
Allattoq Karsten Sommer
aggustip 23-at 2017 15:17

Ataatsimeersuarnermi ”Isumassarsiornikkut ilisimasaqalersitsinikkullu paaseqatigiinnermik klassimi pilersitsineq - Eqqarsaatersuutit piviusunngortuusititsisarput”-mik qulequtaqartup ilinniartitsisut 50-it missaanniittut, ilinniartitsisunngorniat kalaallillu filmiliortartut Ilinniarfissuarmi katersuutsippai.

Taakku meeqqat inuusuttullu atuarfimminni namminneq oqaatsiminnik isiginnaagassiakkut tusagassiutinilu oqaatsitigut qanoq sunniuteqaqataasinnaanerat ilinniassavaat.

Meeqqat inuusuttullu ulluinnarni kulturerisaminni nipinik assinillu nittartakkatigut attaveqaqatigiittarfinni atuinerat atuarfimmilu pisarneq malillugu allattariarsornermik atuakkerinermillu ingerlatsineq imminnut ungasipput.

Atuartut atuartitsissutini assigiinngitsuni siunissami isiginnaagassiortalernissaat, titartakkanik aalasuliortalernissaat pinnguaatinillu ineriartortitsisalernissaat takorloorneqarpoq.

Amerlasuut taama takorluugaqarneq tusarfiginissaa soqutigaat, pilersaarummi pisortaq, Sia Søndergaard Animated Learning Labimeersoq oqarpoq.

- Atuarfinnut filmiliornermullu attuumassuteqartut 50-it missaannittut ataatsimeersuarnermut peqataajartorlutik Nuummiipput, taamaalilluni atuartut namminneq oqaasiliornermikku oqariartuuteqarsinnaalernissaat periarfissaqarnerulissaaq, Sia Søndergaard oqarpoq.

Ilinniartitaanermut Naalakkersuisup, Doris Jacobsenip ataatsimeersuarneq qulinut aallarnerpaa.