Mary Simonip nalunaarusiaa issittumut politikkimik nutaamik pilersitsisoq

Inuit aquttuata ilisimaneqarluartup Mary Simonip canadami naalakkersuisunit kajumissaarneqarluni nalunaarusiaq suliarisimavaa. Imarivaa Issittumi ataatsimut aqutseqariaaseq nutaaq, taannalu aprilimi pisortatigoortumik saqqummiunneqarpoq.

Tamatuma kingorna canadami naalakkersuisut nalunaarusiaq misissorsimavaat. 

KNR-imit sapaatip akunnerani uani apersorneqartilluni Mary Simon oqaluttuarpoq canadami naalakkersuisut nalunaarusiaq siunissami Issittumi ineriartortitsinermi malittariniaraat.

Tulleriiaarinermi arfineq pingasut pingaarnertut tikkuarneqarput. Mary Simonip nammineq pingaarnerutitai tassaapput ilinniarneq,  atuarfiillu annertuumik kulturimut naleqqussakkat.

Ilinniarnerup taama pingaartitsigineranut pissutaavoq taanna tamanut tunngaviliisuummat... suliffinnut pitsaanerusunut aqqutaavoq, peqqinnissap pitsaanerusumik suliniutiginissaanut, pitsaanerusumik aqutseriaatsinut aningaasaqarnikkullu ineriartornermut.

Ilinniartitaanerup iluani pingaarnersiuinermi Mary Simonip assut pisariaqarsoraa Canadap Issittortaani universitetiliornissaq. Canada tassaavoq nunani Issittumiittuni kisiartaalluni universiteteqanngitsoq.

Universitetitaarnissaq pillugu ukiamut ataatsimiisitseqattaartoqassaaq, Kalaallit Nunaannilu Universiteti Ilisimatusarfik isumassarsiorfigalugu paasiniaaffigineqassasoq Mary Simon Canadami ilanngutassiortutsinnut Marianne Stenbækimut oqarpoq.