ASSIT Martin Møller DM-imit sisamanik kuultiuserluni angerlarpoq
Unamminerit takinerpaat 50 kilometerisut isorartutigisumik qangatoortumik arpanneq arfininngormat Gausta Maratonip ingerlanneqarnerani unammissutigineqarpoq, tassanilu qallunaap Lasse Hulgaardip kisimi Martin Møller unammillersinnaallugu arpapput. Unammeqataasoq Nuummeersoq akunnerit marluk 40 minutsit 43 sekundillu atorlugit ajugaavoq. 25 sekundillu qaangiummata Hulgaard Københavns Skiklubimeersoq apuuppoq, tullialu, normu 3-nngortoq, 13 minutsingajaat qaangiummata apuulluni.
Frederik Petersen Ilulissanit ISP-meersoq tallimaalluni apuuppoq, Martin Møllerimit 25 minutsingajannik kingulliulluni.
Noah Mikael Niahsen SSP-mit Sisimiuneersoq normu 18-nngorpoq, 19-inik ukiulinnili bronzennalluni.
17-inik ukiullit 30 kilometerisut isorartutigisumik arpapput, taakkunanilu Aká Olsen SSP-meersoq arpalluarnerpaavoq, akunneq ataaseq 57 minutsit 35 sekundillu atorlugit ajugaagami.
15-inik ukiullit 20 kilometerisut isorartutigisumik arpapput, tassanilu ukioq manna piginnaanilittut nersornaasigaasoq, Bjarne Herbet Hansen, SSP-meersoq ajugaasumit 4 minutsingajannik kingulliuvoq, Sisimiunullu sølvimit angerlaassisussanngorluni.
