Martha: Sulisinnaajunnaarnersiuteqartut sulilersinneqassapput
Suliffiit suut suliffigineqassanersut erseqqissumik nalunaarutigineqanngilaq.
Siusinaarlutik sulisinnaajunnaarnersiuteqartut arlaqartut sulilersinneqarsinnaanerat kommunenit ukiuni tulliuttuni nalilersuiffigineqassapput.
Suliffiit suut suliffigineqassanersut erseqqissumik nalunaarutigineqanngilaq.
Siusinnaarlutik sulisinnaajunnaarnersiuteqartut 3000ngajaasut 15 procentii aappaagu sulisinnaajunaarnersiuteqarunnaarnissaat takorluugaavoq, suliusinnaajunnaarnersiuteqartut allat ullup ilaannaa sulilersinneqarsinnaanerat takorlorneqarluni.
- Sulisinnaassuseqartut akuutikkiartuaassavagut inuiaqatigiinnut, ilaat tamakkiisumik sulisinnaassapput, kisianni ilaat ilaannakortumik siunissamik sulilersinneqarnissaat takorloorneqarpoq, Isumaginninnermut Ilaqutariinnermut naligiissitaanermullu Naalakkersuisoq Martha Lund Olsen Siumut taama oqarpoq.
Siunnersuutigineqartumi ajornartorsiutit
Siusinaarlutik sulisinaajunnaarnersiuteqartut inuiaqatigiinni suleqataanerisa qulakkeerneqarnissaannik suliniuteqarneq illutungiliuttut partiivinit tapersersorneqarpoq taamaattorli siunnersuutigineqartumut ajornartorsiutinik arlaqartunik tikkuagaqarput.
Isumaginninnermut allaffeqarfinni suliat amerlavallaarnerat pissutigalugu sulianik allanik tigusisinnaanerat malinnaasinnaanerallu IA-mit Partii Naleqqamillu ernummatigineqarpoq.
Aamma atuaruk Siusinaartumik pensionisialinnut piumasaqaatit sukannernerusut
Inunnik isumaginnittoqarfippassuarni suliassat annertupput, tamannalu aamma siusinaartumik soraarnerussutisianut tunngasutigut sulialinnut atuuppoq IA siunnersuut pillugu oqaaseqaateqarlutik taama allapput - Inunnillu isumaginnittoqarfinni suliat annertoreersut sullissisullu ilarpassuisa ilinniagaqartuunnginnerat ilisimallutigit, taava malittariassat paasiuminaatsuuppata sullitat kukkuluttortumik sullinneqarsinnaannerannut periarfissat amerlisarneqarsinnaapput IA allappoq.
Suliffissarsiorlutik nalunaarsimasut maannakkut 4000it missaannipput taamaattumik IAp aamma Partii Naleqqap tikkuarpaat, siusinaarlutik sulisinnaajunnaarnersiuteqartut 3000ingajaasut suliffissarsinissaat ajornakusuussasoq.
Isumaginninnermut Naalakkersuisup Matha Lund Olsenip eqqaavaa, inuiaqatigiinni sulisinnaasut siusinaarluni sulisinnaajunnarnersiuteqalernerisigut inuiaqatigiit aningaasarpassuarnik annaasaqartartut, sulilfeqarfinnilu angisuuni siusinaarlutik sulisinnaajunnaarnersiuteqartut sulilersinnaasut.
- Aalisarnikkut ineriartortitisinerit, ukiunilu aggersuni aatsitassarsiornerit annertusaavigineqarnerisigut suliffissat taakkua pilersinnissaat qularinngilluinnarpara,
Isumaginninnermut Naalakkersuisoq Martha Lund Olsen taama oqarpoq.
Siunnersuut inartsisartut ukiakkut ataatsimiineranni aapassaanerlugu pingajussaaneerlugulu oqaluuserissavaat.