Martha Lund Olsenip iliuuseqarnissaq ujartorpaa
Martha Lund Olsen meeqqat atugarliortut pillugit isumaqaginninnermut naalakkersuisumut isornartorsiuteqarluni paragraf 37 atorlugu apeqquteqarpoq.
Isumaginninnermut naalakkersuisup tusagassiuutinut nalunaarummi oqaatigaa Kommune Kujallermi isumaginnittoqarfik ima ajornartorsiuteqartigisoq, allaat meeqqat atugarliortut inuunerannut peqqissusianullu toqqaannartumik kingunerlussinnaalluni.
Taamaammat isumaginninnerup iluani immikkoortortamik nakkutilliisut kommunimut immikkut ittumik januaarimi nakkutilliiartortut, isumaginninnermut naalakkersuisoq Sara Olsvig allappoq.
Meeqqallu inuunerannut toqqaannartumik kingunerlussinnaasumik oqarneq sakkortunerarlugu naalakkersuisoq iliuuseqarnissaanik ujartuilluni, Martha Lund Olsen isornartorsiuivoq:
- Taamak sakkortutigisumik oqaaseqaraanni, ilumut ernumanartoqarsimappat, pisortat taava pisussaaffeqarput iliuuseqassallutik, Siumumeersoq, Martha Lund Olsen, oqarpoq.
Matumanilu innersuussutigaa qitiusumik pisortat kommunip isumaginnittoqarfia suliamik naammassinnissinnaanngippat akisussaaffik tigugallarsinnaagaat.
- Kommunit iliuuseqarnermikkut meeqqat inuusuttullu naammaginartumik illersorsinnaanngikkunikkit taava kommunit akisussaaffiiagagallarnissaat ilaatigut periarfissaasinnaavoq.
