Martha Lund Olsenip meeqqat pisinnaatitaaffeqarnerulersinniarai
Meeqqanut ikiorsiisarneq pillugu inatsisissatut siunnersuummi Naalakkersuisut taama siunnersuuteqarput, Inatsisartullu akuersissappata, inatsit 2917-imi juulip aallaqqaataani atuutilissaaq.
Naalakkersuisut inatsisitigut sukaterinissaq siunniuppaat, taamaalilluni meeqqat pisinnaatitaaffeqarnerat pingaartinneqarnerulissalluni, Inatsisartut siunnersuummut akuersaarpata, kommunit Namminersorlutillu Oqartussat meeqqanut tunngasunik suliaqartarnerat allanngussaaq.
Tassalu kommunit qitiusumillu oqartussat akisussaaaffimmik suliassanillu qanoq agguataarinninnersut erseqqinnerulissaaq, aalajangersimasunik pisoqartillugu kikkut akisussaasuunersut ersarinnerulerluni.
Taava meeqqat ikinnerusut angerlarsimaffimmik avataanut inissineqartassapput ilaqutariillu nukittorsarneqassallutik.
Taamaammat suliniutit pinaveersaartitsinerillu piaartumik aallertinneqartarnissaat ilaqutariinnut isumaginninnermullu naalakkersuisoq Martha Lund Olsen oqarpoq.
Aamma atuaruk Aviâja E. Lynge: Meeqqat pisinnaatitaaffii unioqqutinneqarput
Meeqqat suliat imminerminnut tunngasut pillugit naammagittaalliorsinnaanngussapput.
Meeqqat angerlarsimaffiup avataaneereersimallutik angerlartinneqassagaangata tamanna pilersaarusiorluarnikkut pisassaaq.
Meeqqat 18-inik ukioqalersimallutik ikiorneqarnissamik suli pisariaqartitsingaangasa tamakkunannga sernissuisunik taaneqartartut sullissinerat pitsanngorsaavigineqassapput.
- Siunnersuut naapertorlugu meeqqat inissinneqarnissamut ulorianartorsiortut, inissinneqareersimasullu sullinneqarnerat pitsanngorsaavigineqassapput. Inatsisissatut siunnersuutip inissiisarnerit appariartissavai, oqilisaasussallu ikiunissaat ajornannginnerulersillugu, naalakkersuisoq taama allappoq.
Naalakkersuisut siunnersuutip 2016-imi siullermeerneqarnissaa anguniarpaat, 2017-imilu upernaakkut ataatsimiinnermi aappassaanneerlugulu pingajussaaneerneqarnissaa siunertaralugu.
Siunnersuut tusarniaassutigineqaqqaarmat kommunit isorisimangaarmassuk marloriarluni kommuninut tusarniaassutigineqarsimavoq.
Taamatut sukaterinerit Nunatta karsiata aappaagu 27,8 millionit koruuninik aningaasartuutigissavai. Naalakkersuisulli naatsorsuutigaat aningaasaliissutit tamatuma kingorna apparumaartut.
