Martha Lund Olsen: Suleqatigiinneq pinngitsaaliineq pitinnagu
Inatsisissatut siunnersuut, tassalu kommunit meeqqanik sumiginnarneqartunik ikiuutinngippata kommunit oqartussaaffiinik naalakkersuisut tigusinissaannik, Martha Lund Olsenip siunnersuutaata, isornartorsiorneqarneranut akissuteqarluni.
- Soorunami aallaqqaammut taamatut ingerlaannaq iliuuseqarnianngilagut, kisianni kommunit aaqqiissuteqarnissaannut periarfissinneqassapput, Martha Lund Olsen oqarpoq.
- Kommunit aaqqiissutissamik iliuuseqanngippata inatsit atuutilersussaassaaq, Isumaginninnermut Naalakkersuisoq Marthta Lund Olsen taama oqarpoq, inatsisissatut siunnersuutaa sakkortuumik isornartorsiorneqartoq akissuteqarfigalugu.
Aamma atuaruk KANUKOKA siunnersuummut isumaqataanngilaq
Ilaatigut isornartorsiuisuupput kommuneqarfik Sermersuumi borgmesteri Asii Chemnitz Narup Inuit Ataqatigiit.
Taanna oqarpoq Martha Lund Olsen, kommunenit ajunnginnerisumik sulisinnaaguni isumaginninnermut oqartussaaffiit tigusariaqarai, kommunit qunusaarnagit.
- Tamanna piviusorsiornerussaaq, Asii Chemnitz Narup oqarpoq.
Borgmesteri isumaqarpoq, isumaginninnermut oqartussaaffiit taama annertutigisut naalakkersuisunit tiguneqarpata, kommunit missingersuusiorsinnaanerat ajornakusuussasoq, kommunillu aningaasaatai atorlugit.
Aamma atuaruk Naalakkersuisut kommunit nakkutiginerulerniarpaat
Kommunini suliat naalakkersuisunit tiguneqaraluarpataluunniit kommunit akilertussaammatigit.
Martha Lund Olsenip inatsisissatut siunnersuutigisani aalajangiusimavaa.
- Kommuni aaqqissuutissamik kajumissuseqarnerani sumiginnaaginnarpat inatsit taanna atuutililersussaassaaq, Martha Lund Olsen taama oqarpoq.
Martha Lund Olsenip nassuiarpaa, Naalakkersuisut nammineerlutik nakkutiginninnermi isumaginninnermut suliani ajornartorsiuteqartut takuneqarsinnaasimasoq taamaattumillu inatsisiliornissaq pisariaqartoq.
Neriuppunga inatsit atorfissanissanngitsoq, kommuninillu suleqateqarnikkut aaqqinneqarumaartoq, inatsisillu naapertorlugit kommunit suliassatik aaqqissinnaagaat, Martha Olsen oqarpoq.
KANUKOKA-p siulittaasua Palle Jerimiassen Siumut, kommunit pingasut KANUKOKA-mi ilaasortaasut sinnerlugit isornartorsiuteqartunut ilannguppoq. Taanna isumaqarpoq, pissutsit ajunnginnerulissappata Naalakkersuisut kommuninik suleqateqarnerunissartik suliuniutigisariaqaraat.
Inatsisissatut siunnersuutip tusarniaassutigineqarnera februaarip ulluisa 19-anut killeqarpoq.