Marokkomioq Canadamut nunasiniaq Qaqortumi tigusarineqarpoq
Angut Marokkomioq umiarsuarmut takornariartaammut ikisimavoq, Norgemi Bergenimi, tassanngaanniit Canadamut ingerlaqqinniarsimavoq tassani qimaasutut qinnuteqarniarluni.
Taamatulli takorluugaqarnera ataasinngornermi ullaakkut taamaatinneqarpoq, tassami umiarsuaq takornariartaat Qaqortumut tikimmat angut marokkumioq Qaqortumi politiit tigusagaraat
Taama KNR-imut oqaluttuarpoq kujataani politiit pisortarigallagaat Laila Fleischer.
- Umiarsuup takornariartaatip suleqatigisatta ataasinngornermi ullaakkut attaveqarfigaatigut, tamatumalu kingorna politiit umiarsuarmut takornariartaammukartippagut angut Marokkomioq tigusariniassamassuk. Tigusarinninneq eqqissisimasumik pivoq, Laila Fleischer oqarpoq.
Kujataani politiit pisortaata oqaluttuaraa angut Marokkomioq tigusarineqartoq 1999-mi inunngortuusoq aqqullu siulleq atorlugu Norgemut utertinneqarumaartoq,
Umiarsuaq takornariartaat Qaqortumit ualimut aallaarpoq.