Maqaasineqartut ujaarineqarnerat politiit taamaatiinnaraat
Juunip 17-iani qarsutsitsineqarnerata kingornali inuit taakku sisamat timmisartumik, qulimiguulimmik, umiarsuarmik gummibådinillu arlaleriarlugit ujaarineqartaraluarput, iluatsinngitsumilli.
Ajunaarsimanissaallu ilimagineqartoq politiit sapaatit-akunnerata siuliani ilisimatitsissutigaat.
Karrat kangerluani qaqqap sisoornerata tassaarsuaqartitsineratigut Nuugaatsiami illut aqqanillit imaanut amuneqarput inuillu pineqartut sisamat maqaasineqalerlutik.
Issittumi Sakkutooqarfik naapertorlugu, nunaminertamit 1100 meterit x 300 meterit missaaniittumit ujaqqat sioqqalluni imaanut sisoorsimapput.
Tamatuma kingorna qaqqap sisooqqinneratigut sumiiffimmi tassaarsuaqaqqissinnaanera pissutigalugu nunaqarfiit arlallit inuerussorneqarput.
AAMMA ATUARUK Issittumi sakkutooqarfiup ujaasinini nangeqqikkaa
Qaqqap sisooqqissinnaanera suli aarlerineqarpoq, oqartussalli arfininngormat naliliipput nunaqarfinnut tallimanut Uummannamullu tamanna navianaateqanngitsoq.
Naatsorsuinerit ilaatigut Danmarkimi Nunatsinnilu ujarassiuutut misissuisoqarfimmit GEUS-imit suliarineqartut politiinit innersuussutigineqarput.
Taamaammat nunaqarfinni Niaqornani, Saattuni, Ukkusissani, Ikerasammi Qaasunilu kiisalu aamma Uummannami innuttaasut arfininngormat eqqissiallapput.
AAMMA ATUARUK Ajunaarnersuup kingorna Nuugaatsiamut alakkarterisut
Namminersorlutik Oqartussat ippassaq ataasinngornermi ilisimatitsissutigaat Niaqornanit qimagussortitsisoqarnera taamaatinneqartoq, nunaqarfimmilu najugaqartut sulisullu utertinnissaannut aaqqiissutissamik oqartussat suliniuteqartut.
Qaqqalli sisooqqissinnaanera pissutigalugu nunaqarfinnit Nuugaatsiamit Illorsuarniillu qimagussortitsisoqarnera atuutiinnassaaq.
/ritzau/
