Kalaallit Nunaanni nutaamik kørekortitaarsinnaaneq EU-mi malittarisassat nutarterneqarnerisigut ajornerulissaaq

Ukioq manna ukiortaamiit inuit biilinik ingerlatitsisinnaanermut uppernarsaatitik, tassa kørekortitik Danmarkimi pisatik taamaallaat Danmarkimi najugaqartutut nalunaarsimagunik nutartersinnaalersimavaat.

EU-kommissionip piumasaqarneratigut malittarisassaq eqqunneqarsimavoq pinaveersaarniarlugu inuit EU-mi innuttaassuseqanngitsut danskisut duplikatkørekortinik taasartagaannik kørekortitaaginnarsinnaanerat.

Malittarisassaq aamma Kalaallit Nunaanni najugaqartunik danskisut kørekortilinnik eqquinerluppoq.

AAMMA ATUARUK 17-inik ukiullit biilernermut allagartartaartarnissaat Demokraatit ornigigaat

Tamannali kukkuluttornerusoq Aaja Chemnitz Larsen Inuit Ataqatigiit sinnerlugit Folketingimi ilaasortaq isumaqarpoq.

Taanna danskit angallannermut ministeriannut apeqquteqaammi ilaatigut allappoq malittarisassaq eqquinerluttoq, Naalagaaffeqatigiit akornanni killeqarfimmi kanngiffiliisutut.

Taamalu isiginninneq ministerip eqqornerarpaa.

Ministerip maanna EU-kommissioni qinnuiginialerpaa Kalaallit Nunaanni Savalimmiunilu innuttaasut danskit kørekortiannik peqartut malittarisassani ilannguteqqunagit, angallannermut ministeri Ole Birk Olesen Chemnitz Larsenimut taama akissuteqarpoq.

Nunatsinni najugallit danskisullu kørekorteqartut ullumikkut kørekortitik kalaallit ingerlatsisinnaanermut uppernarsaataannut allanngortissinnaavaat. Kalaallit Nunaat 1985-imili EU-mit anigami ilaasortaaqqissimanngilaq.

AAMMA ATUARUK Venstre: Naalagaaffeqatigiinni killeqarfitsigut aporfiusut ikilisinneqassapput