Manchesterimi qaartartumeerisoqarnerata kingorna 23-nik ukiulik tigusarineqartoq

Angut 23-nik ukiulik Manchester Arenami qaartartumeerinermut atassuserneqartoq tuluit politiivinit tigusarineqarsimavoq.

- Manchester Arenami ataasinngormat unnukkut pisunut atatillugu angut 23-nik ukiulik South Manchesterimi tigusarisimallugu uppernarsarsinnaavarput, politiit Twitterikkut taama allapput.

Tigusarinninnermut tunngatillugu paasissutissanik allanik saqqummiussaqanngillat.

Qaartartumeerisup kiunera politiinit ilisimaneqarpoq avammulli saqqummiunnianngikkallarpaat, tuluit ministeriunerat Theresa May ilisimatitsivoq.

Taanna Londonimi Downing Street 10-p saavani oqaluttuarpoq ataasinngormat unnukkut qaartartumeerinermi eqqugaasut 59-it ilarpassui inuunerminnik ulorianartorsiortitsisut.

Qaartartumeerisup Manchester Arenami anisarfiit ilaata eqqaani qaartartoq qaartissimagaa aamma oqaatigaa.

Tusarnaartitsisarfissuup iluaniipput inuit 21.000-it. Taakku amerikamiu erinarsortartoq Ariana Grande tusarnaariarpaat, tusarnaartitsinerlu naammassimmat qaartartoq qaartinneqarpoq inuillu 22-t toqutaallutik.

Toqutaasullu ilagaat qaartartumeerisoq.

/ritzau/AFP