Manchesterimi qaartartumeerineq angutip ataatsip piliaraa

Manchester Arenami qaartartumeerineq angutip ataatsip piliaraa inuillu 22-t toqutaasimapput, politiit oqaaseqartartuata tamanna uppernarsarpaa.

Qaartartumeerisoq erinarsortartup Ariana Grandep tusarnaartitsineranut qaartartumik nassataqarsimavoq. Qaartartumeerinermini nammineq aamma toquvoq.

Manchesterimi politiit oqaaseqartartuata ilisimatitsissutigaa toqutaasut 22-t ilaat meeraasut. Qassiunersulli oqaatiginngilaa.

59-it aqqunarsimapput.

Qaartartumeerisoq ingasaassiniartuneersuunersoq imaluunniit kisimiilluni taama iliorsimanersoq politiit maanna paasiniaaffigileruttorpaat.

Takunnittut oqaatigaat tusarnaartitsineq naammasseqqammersoq sakkortuupilussuarmik qaartoqarnera tusaasimallugu, inersuarmilu qulliit kingunitsianngua ikinneqartut.

Tusarnaartitsisarfissuup isaariaasa ilaanni qaartitsineq pivoq.

Tuluit Nunaanni peqqarniisaarniarnerit 2005-imiilli ajornersaraat, taamani Londonip nunap iluatigut qimuttuitsoqarfiani bussimilu quleriinni ataatsikkoortumik saassussisoqarnerani inuit 50-it toqutaapput.

Taamani saassussisut muslimiupput ingasaassiniartut.

Inuit 21.000-it Ariana Grande tusarnaariarlugu Manchester Arenamiipput. 21.000-illu ilagaat meerarpassuit inuusuttuaqqallu.

- Qaartoqarpoq, inuillu qaarfiusumit tungitsinnut qimarratilerput aniniarsarilerlutillu, takkunnittut ilaat aviisimut The Guardianimut taama oqaluttuarpoq.

Tusarnaariat ilaat, Catherine MacFarlane, nutaarsiassaqartitsivimmut Reutersimut oqaluttuarpoq anisarfiup eqqaaniitilluni sakkortuupilussuarmik qaartoqartoq.

- Sakkortuupilussuuvoq. Naqitsinera sakissakkut malugineqarsinnaavoq. Uivernersuaqarpoq. Kikkut tamarmik qimarrapput nilliallutillu aniniarsaripput, takunnittoq oqaluttuarpoq.

Tuluit ministeriunerata konservativineersup Theresa Mayip unnuup ingerlanerani uppernarsarpaa pisoq "amiilaarnaannartumik peqqarniisaarniartoqarneratut" paasiniaaffigineqartoq.

Mayip Labourillu siuttuata Jeremy Corbynip, tuluit inatsisartuinut juunip arfineq-pingajuani qinersinissamut qineqqusaarneq unitsikkallarneqassasoq isumaqatigiissutigisimallugu aamma nalunaarutigaat.

/ritzau/