Maliina Abelsen Air Greenlandimi tuniniaanermut pisortanngorpoq
- Nuannaarutigisorujussuuara Maliina Abelseni tuniniaanermi pisortassatsitut nutaatut saqqummiussinnaagakku. Inuk pissarsiariniagarput tassaasimavoq niuernerpalaartumik pingaartitsisoq, nunami maani niuerfitsinnut aammali niuerfinnut nunani allaniittunut tunngatillugu, pisortaaneq Michael Højgaard oqappoq.
Maliina Abelseni ukiuni siuliini Arctic Winter Gamesimut siuuttuuvoq, taassumalu siuliani Inuit Ataqatigiit naalakkersuisuutitaqarneranni aningaasaqarnermut naalakkersuisuulluni.
- Suliffeqarfimmi inuiaqatigiinni kalaallini qitiusumik inissisimasumi, aammalu sanngisuumik kulturilimmi kiisalu ineriartortuarnissamik anguniagaqarfiusumi sulilernissara qilanaarisorujussuuara. Air Greenlandip siuuttutut, aammalu sutigut tamatigut pitsaanerpaamik kiffartuussinerminik ingerlatitseqqinnissaa qulakkeerniarlugu suleqataaffiginissaa pissanganassaaq, Maliina Abelsen oqarpoq.
Aamma atuaruk Air Greenlandimi tuniniaanermi pisortaq soraarpoq
Atorfinitsitsiniarluni suliap ingerlanneqarnerani Air Greenlandip immikkut pingaartitsimasaa tassaavoq qinnuteqartut akornanni 'aqutsinikkut misilittagaqarluarnissaq, suliffeqarfiup pingaarnertut niuerutaanik ilisimasaqarluarneq, tassaasullu kalaallit, aammalu suliffeqarfimmik aqutsinermi niuernerpalaartumik aallussinissaq'.
