Maliina: Aatsitassat atugarissaarnerput qulakkiissavaat
- Aatsitassarsiorneq Nunatsinni aatsaat iluatsissaaq, uagut nammineq sulisinnaaasortavut qaarusunni aamma sulisussanngorlugit ilinniartikkutsigit, soorluttaaq aatsitassarsiorneq avatangiisit pineqartillugit illersorneqarsinnaasumik ingerlanneqartariaqartoq. Ineriartorneq kalaallit nammattussaavaat, Maliina Abelsen erseqqissavoq.
Nunatsinni aatsitassarsiornikkut ineriartorneq pillugu avatitsinni isumakuluuteqarneq taassuma aamma pasinarnerarpaa, oqallinnerli illuinnaasiorpallaarnerarlugu.
- Isumakuluttut paasisinnaavakka. Oqallinnermili pissutsit assigiinngiiaarneri ilanngutigiinngitsooqqajaaneqartarput, ersisaarutit tusarsaanerulertarlutik, Maliina Abelsen oqallittuni oqarpoq.
Taassuma ilanngullugu oqaatiga, aaatitassarsiornissamut sinaakkusersuinermi nunani soorlu Canada-mit Norgemillu Nunarput paasisassarsiortartoq.
Bruxellesimiinnermini aamma nunat tamalaat peqataaffigisaat "Kalaallit Nunaata ikinngutai" oqalugiarfigai. Tassani peqataasut tassaapput EU kommissionimeersut, aallartitaqarfinneersut, sunniiniartartut kiisalu inuit Kalaallit Nunaanni ineriartornermut soqutiginnittut. Tassani Maliina Abelsenip erseqqissarpaa ineriartorneq piujuaannartitsinermik tunngaveqartussaasoq.
Maliina Abelsenip aamma ataatsimeeqatigaa Danmarkip EU-mi aallartitaa aammalu OLT-mi ilaasortat ilaat, EUp inatsisartuini ilaasortat aamma EU kommissionimiit aallartitat.
EU-mik suleqateqarneq landskarsip ukiumut 320 millioner koruuninik isertitsissutigisarpaa.
