Nipi uumasunik qimaatitsisoq
Qeqertaalummi Igoolimmi piniartut immap naqqaneersumik eqqumiitsumik nipimik tusaasaqartarnertik qaammaterpassuarni oqaatigeqattaareerpaat.
Illoqarfiup avannaata kitaani 120 kilometerinik ungasitsigisumi nipi immap naqqaninngaanneersoq tusaaneqartarsimavoq.
Nipi seqqorpaluttumik niperujoorpaluttumillu nipeqartoq, piniartut oqaluttuarput.
Piniartoq ittanneq Nunavummilu inatsisiliortuni ilaasortaq George Qulaut CBC-mut oqaluttuarpoq piniarfimmi tassani puiserpassuaqarlunilu aarrinik ulikkaartaraluartoq, aasarmannali qimaatinneqarsimapput, timmissat kiserngorullugit.
Timmisartorlutik nakkutilliisut immap ilaa sapaatip akunnera una misissorsimagaluarpaat, arlaannilli pasinartoqarsinnaasumik nassaarsimanatik.
Nipit suuneri suminngaanneernerilu suli paasineqanngilaq. Qeqertaalummi aatsitassarsiorfimminngaanneersorineqaraluarpoq, aatsitassarsiorfimminngaanneersunilli oqaatigineqarpoq nipiliorfiusup eqqaani atortorissaaruteqanngitsut, taamatullu nipiliorsinnaasunik atortorissaaruteqarnatik.
Nipi suli nassuiaatissaqartinneqanngilaq piniartullu allamukaqqaarlutik piniariartariaqassapput.
