Mælkebøttimut aningaasat naammalerput
Nuummi meeqqat inuusuttuaqqallu sumiginnagaasut ornittagassaata ”Mælkebøtten”-ip aningaasaqarnikkut siunissaa qularnaarneqarpoq. Taama suliniummik aallartitsisut nalunaarput. Maannamut 6,7 mio. koruunit katersorneqareersimapput, taakkualu illup allanngortiterneqarnissaanut ukioq mannalu aqutsinermi aningaasartuutinut atorneqassapput.
Nuup kommunea ukioq mannamut ukiunilu tulliuttuni marlunni aqutsinermi aningaasartuutit sisamarterutaannut aningaasaliisarniarpoq.
Mælkebøttip ingerlanneqarneranut aningaasartuutissat sinneri fondtinit aningaasaliisartunit namminersortunillu aaniarneqarput. Mælkebøttip ukiumut ingerlanneqarnera 3,2 mio. koruunenut tagginneqarpoq.
Fondtip Mælkebøttimik pilersitsiniaqatigiit siulittaasuata Kirsten Ørgaard-ip aningaasassarsiornerup iluatsilluarnissaa neriuutiginerarpaa. Aningaasanillu katersuiniarneq Red Barnet suleqatigalugu ingerlanneqassaaq.
