Internetti sukkanerusoq Nunaqarfiit 2018-imut utaqqisariaqassasut
Nunaqarfiimmi attavilerneqarnissaannut suli suliassaqangaatsiarpoq, 2018-imili suliap naammassineqarnissaa naatsorsuutigineqartoq, Tele-Postimit oqaatigineqarpoq.
Innuttaasut 92 procentiisa Nuummi Qaqortumilu internettimik neqeroorutaasut assinginik periarfissaqalernissaat Tele-Postip anguniagaraa.
Innuttaasullu 80 procentii ullumikkumit taama periarfissaqalerput, internetti sukkanerusoq inoqarfinni katillugit 14-ini atorneqalermat.
Anguniagaasumi procentit kingulliit aqqaneq-marluk ilaatigut tassaapput kitaani nunaqarfiit.
- Nunaqarfinnut tunngatillugu annertuumik suliniuteqarpugut, tassaasoq nunaqarfinni tamani 4G-mik attaveqaasersuinissaq. Taamaaliornikkut nunaqarfinni aamma internetti sukkasooq atorneqarsinnaanngussaaq, Tele-Postimi attaveqaqatigiinnermut pisortaq Arnakkuluk Jo Kleist taama oqarpoq.
AAMMA ATUARUK Nunaqarfiit attaveqanngitsut
Nunaqarfinni 4G-mik attaveqaasersuinermut atatillugu maanna atortorissaarutigineqartut atortorissaarutinik aqquteqanngitsunik sukkassutsinut qaffasinnerusunut atorneqarsinnaasunik taarsersorneqassapput.
Tamatumalu suliaqarnera aappaagu aallartinneqassaaq.
Uummannamit Upernavimmut sakkortusaavitigut attaveqaat 2018-imi aamma tallilerneqartussaavoq. Tamatuma suliarineqarnera ukioq manna naammassineqartussatut pilersaarutigineqaraluarpoq, aasaaneranili nittaattarnera anorersuartarneralu pissutigalugu suliaq aappaagumut kinguaattoorutigineqarpoq.Taamaammat Kitaani nunaqarfinni Upernavimmilu internetti sukkanerusoq aappaagu aatsaat periarfissaalissaaq.
AAMMA ATUARUK Internettimut attaveqarnerup pitsaanerulersinnissaa issittumi nunat sulissutigisariarpaat
Internettip sukkassusianik pitsanngorsaanerit Qaanaap pigisaani Tunumilu aamma piffissaq ungasinnerusoq aatsaat pisinnaassapput.
Nunami tamakkerlugu 4G-mik attaveqaasersuisoqarnera Tunumut Avannaanullu aamma atuukkaluartoq, qaammataasat internettimik pilersuisuusut killeqartitsipput taamaattumillu internettimik pitsanngorsaatitut taaneqarsinnaanngilaq, Arnakkuluk Jo Kleist taama oqarpoq.
