Lykketoftip nunatsinnit ilaasortanngortussat pissangassutigisariaqarpai

Nunatsinni Folketingimut qinersinermi partiit talerperliunerit isertitaqassangaluarpata tamanna Anders Fogh Rasmussenimut siuariaataassaaq, Demokraatimmi oqaatigereerput Danmarkimi partiit maannakkut naalakkersuisuutitaqartut tapersersoritik.

Atassummeersut isumaqarput Anders Fogh Rasmussen ministeriunertut ingerlaannartariaqartoq.

Folketingimi ilaasortat Siumumeersup Lars-Emil Johansen-ip IA-meersuullu Kuupik Kleistip Socialdemokratit qaninneruvaat.

Aviisit Sermitsiaq AG-lu naliliipput Lars-Emil Johansen-ip Kuupik Kleist qinigaaqqinnissaat qularnaateqarsinnaasoq.

- Demokraatit siulittaasuat Per Berthelsen qinigaarataannaavoq, qinersisartummi nutaaliortoqarnissaanik ujartuipput, Lars-Emil Johansen-ilu sanngiitsumik qineqqusaarpoq, AG-ip aaqqissuisua Laila Ramlau Hansen, naliliivoq. Sermitsialli aaqqissuisuata Poul Krarup-ip Lars-Emil Johansen-ip ajorsartitaanissaa qularnartoqartinneruvaa.

-Per Berthelsen uloriartortitsisinnaalluarpoq, qinersinerulli inernissaa eqqoriaruminaappoq. Siumut Nuummi sanngiittutut oqaatigineqarsinnaagaluartoq sinerissami nukittuujuvoq, Poul Krarup naliliivoq.

Folketingimulli qinersinissaq pillugu suli isumasiuisoqanngilaq.