Lund Olsen politikeriujunnaarluni atorfilittanngortussanngorpoq

Siornatigut naalakkersuisuusimasoq Martha Lund Olsen, Kommuneqarfik Sermersuumi Meeqqanut Ilaqutariinnullu ingerlatsivimmi decembarip aallaqqaataanit pisortanngussaaq. Taamaalillunilu politikki qimassallugu. Taama allappoq Sermitsiaq.ag.
Allattoq Apollo Jeremiassen, Ivik Kristiansen
septembarip 22-at 2017 09:47

Siumut sinnerlugu Kommuneqarfik Sermersuumi kommunalbestyrelsimut taamatullu Inatsisartunut ilaasortap, Matha Lund Olsenip politikki qimallugu pisortanngortussanngorpoq.

Kommuneqarfik Sermersuumi kommunalbestyrelsimit Martha Lund Olsen ilaasortaajunnaassaaq, taamatullu Inatsisartut aappaagu upernaakkut ataatsimiilinnginneranni aamma ilaasortaaffigiunnaassallugit. Sermitsiaq.ag allappoq.

Martha Lund Olsenip KNR-imut uppernarsarpaa, ukioq manna decembarip aallaqqaataanit Kommuneqarfik Sermersuumi Meeqqanut Ilaqutariinnullu ingerlatsivimmi pisortanngortussaanini.

- Taamaammat kommunalbestyrelsimit ilaasortaajunnaartariaqassaanga, Martha Lund Olsen KNR-imut oqarpoq.

Inatsisartut ukiaq manna ataatsimiinneranni peqataanissani nalunaarutigaa, ataatsimiinnerli naammassippat qanoq pisoqassanera oqaatigerusunnagu.

Kommunimut upernaaq qinersisoqarmat Martha Lund Olsen 482-inik taaneqarluni ilaasortanngorpoq Inatsisartunut 2014-imi qinersinermi 226-nik taaneqarluni ilaasortanngorluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq