Kujallermi mittarfissaq timitalerneqangajalersoq

Mittarfittaassamik suliap sumut killinnera Kalaallit Airportsimi pisortaqatigiit Kommune Kujallermi pisortanut politikerinullu saqqummiuteqqammerpaat. Peqatigiillutillu mittarfittaassap inissisimaffissaa alakkartersimavaat.

Borgmesterip tulliata siulliup inuussutissarsiornermullu ataatsimiititaliami siulittaasup Siumumeersup Simon Simonsenip Kalaallit Airportsip suliniummik killiffia nuannaarutigaa.

- Mittarfissap - ukiorpassuarni oqaluuserineqartartup timitalerneqanngisaannarsimasulli - kiisami timitalerneqartussanngornera ima qanitsigilerparput maanna piffissanngorluni atsipaat kangujarterlugit timitaliinissamik anguniagaqarluta kujataani suleqatigiinnissatsinnut, tusagassiorfinnut nalunaarummi taama oqarpoq.

Taamaammat kommunip inuussutissarsiutinik ingerlataqartut ukiaru ataatsimeersuarnissamut qaaqquniarpai suliffeqarfiit periarfissaat nutaat eqqartorniarlugit, taamaaliornikkut mittarfiup illoqarfimmiunit ullormit siullermit tamakkiisumik atorluarneqarnissaa qulakkeerniarlugu, Simon Simonsen taama oqarpoq.

Kalaallit Airports A/S-ip tikeraarnerminut atatillugu aamma nunap immikkoortuani inuussutissarsiutinik ingerlataqartut ataatsimeeqatiginiarpai. Inuussutissarsiutinik ingerlataqartut mittarfittaassamut atatillugu sunik tigussaasunik pilersaaruteqarnersut Kalaallit Aiportsip tusarusuppaa, mittarfimmi illorsuup utaqqisarfiup qanoq angitiginissaa pillugu isumaqatigiissuteqarnissaq siunertaralugu.