Londonimi orsumik tiggunnersuaq 130 tonsi piialeraat
Taamaattumik Londonimi eqqakkat aqqutaanni sullulinni sulisartut maanna orsumik tiggunnersuarmut akiuinialerput.
"Orsupiluunersuarmik qaleriiaattumik" taagorneqarpoq.
Tiggunnersuaq 130 tonsitut oqimaatsigaaq, 250 meterisullu takissuseqarluni. Tassunga qaleriiaattut tassaapput pappialat allarutissiat, nalequtakut, nangikut, nerisassat sinnikui orsorlu; tiggunnersuaq taanna Londonip aqquserngisa ataanni eqqakkat aqqutaannik sullulinnik milikartitsivoq.
Tiggunnipiluunersuaq taanna piiarniarlugu sulineq maanna aallartippoq, suliarinerali sapaatit akunneri pingasut angullugit sivisussuseqarsinnaavoq.
Orsupiluunersuaq qaleriiaattoq Tuluit Nunaanni illoqarfiit pingaarnersaata kangiatungaaniittumi aqqusinersuup Whitechapelip ataatigoorpoq - manngertupilussuullunilu.
- Eqqakkanik qaleriiaattunik taama angitigilersunik siornatigut naammattuuisimanngilagut. Angisoorujussuuvoq, taamaammat piiarnissaanut sulisorpassuarnik maskiinarpassuarnillu pisariaqartitsivugut, ujaqqatummi manngertigisoq, kuuffiit aqqutaannut akisussaasuusoq Matt Rimmer oqarpoq.
Suleqatigiit arfineq pingasuusut naqitsineq annertooq atorlugu tiqqunnersuaq avissaartinniarsaraat. Agguaqatigiisillugu ullormut 20-30 tonsi piiarsinnaavaat. Sequnnerit minnerit milluartillugit puunut katersorneqarput.
- Betonimik nalluinermut assersuunneqarsinnaavoq. Pakatsinartupilussuuvoq, eqqarsaatigigaanni tamanna pinngitsoortinneqarsinnaasoq. Tassami inuit orsoq uulialu kuuffinnut kuisarpaat, allarutissiallu masattut, nalequttat nangillu anartarfitsigut kuutsittarlugit, Matt Rimmer oqarpoq.
/ritzau/AFP
