London Miningip aatsitassarsiorfik tuniniarpaa

Aatsitassarsioqatigiiffiup London Miningip, aningaasatigut ajornartorsiuteqalernerata kinguneranik taanna aningaasatigut nakkutigineqalerpoq aatsitassarsiorfillu Marampa, Afrikami Sierra Leonemiittoq tunillugu.

PriceWaterHouse and Coopersip London Miningimik nakkutilliisua, Peter Dickens taama nalunaarpoq.

- Aatsitassarsiorfiup Marampap Timis Corporationimut tuninerani isumaqatigiissutit pitsaasut, London Miningip aningaasatigut aqutsisuinit nuannaarutigineqarput, isumaqatigiissutillu sapaatip akunnerata uuma naanerani naammassineqarsinnaassasut ilimagineqarluni, Peter Dickens ippassaani sisamanngormat taama oqarpoq.

Timis Corporationip aatsitassarsiorfik pisiarimmagu tassani sulisut ingerlaannarnissaat aamma isumaqatigiissutaavoq. Tamannalu Timis Corporationip siulersuisuini siluttaasup, Frank Timis nuannaarutigaa, taamaalilluni aatsitassarsiorfik Sierra Leonemut pingaaruteqartoq annaanneqarluni.

London Miningip Nuup kangerluani Isukasiani aatsitassarsiornermut akuersissutaat qanoq pineqassanersut suli maannamut ilisimaneqanngilaq.