London Mining akilersuiunnaarpoq
Nuup kangerluani Isukasiani saviminissamik piiaaviliornissaq pivisunngunngitsoorsinnaasoq, aviisi Berlingske Business allaaserisaqarpoq, tamatumunngalu pissutaasoq tassaalluni Afrikap kitaani ebolamik tunillaassuunneq.
Saviminissamik piiaviliorfiup sanaartorneqarnerani suliffissanik 3000-nik suliassaqartitsinissaa pilersaarutaagaluarpoq, nunattalu karsianut ukiumut 2 milliarder koruuninik isertitsissutaasarnissaa takorloorneqarluni. Pilersaarut piviusunngunngitsuussagunartoq, aviisi Berlingske Bussiness allaaserisaarpoq.
Aamma atuaruk Savimminissarsiorfissatut pilersaarut nalorninartorsiorfiusoq
London Mining saviminissamik piiaaviliornissamut akuersissuteqartoq akiliisinnaajunnaarsimasoq, tusagassiuutinut nalunaarummi atuarneqarsinnaavoq.
Saviminissat tunineqartartut akiisa appariarujussuarnerat pissutigalugu aatsitassarsiorfik aningaasatigut ajornartorsiorpoq, akiliisinnaajunnaarneralu pivoq Sierra Leonemi ebolamik tunillaassuunneqarnerani.
London Miningip Liberiami piiavik Marampa, illoqarfiit pingaarnersaannit Freetownimit 120 kilometerisut avannarpasinnerusumiittoq, tuniniarsimagaluarpaa, ebolamilli tunillaassuunneq pissutigalugu pisiumasunik soqutiginnittoqarani.
Aamma atuaruk London Mining indiamiut pisiarissallugu soqutigigaat
Ebolamik tunillaassuunerup ernumanartorsiortitsinera pissutigalugu, saviminissamik piiaavimmi sulisut ullormut marloriarlugit kissarnersiorneqartarput tunillatsissimanersut paasiniarlugit.
Nunami pilersitat nalillit tamakkiisut 10 procentii piiaavimmit pissarsiarineqartarput, ebolartoqalermalli piiaavimmiut assut tamaviaartitaalersimapput.
Kalaallit Nunaanni saviminissamik piiaavissaq assut maluginiarneqarsimavoq, London Mining pilersaarsimammat nunatsinni akigititaasartunik atukkatigullu appasinnerusumik sulisartut amerlanerit Kinamiit tikisinniakkatik akilertassamaaramikkit atugaqartillugillu. Aatsitassarsiorfik nunatsinni maannamut annerpaasussaangalluarpoq 14 milliarder koruuninillu naleqarluni.
Aamma atuaruk London Mining aningaasatigut ilungersunartorsiortoq
London Miningip ukiuni kingullerni arfineq marlunni Isukasiani piareersaanerminut 60 millioner dollars atorsimavai, tassa 340 millionit koruunit. Tassalu paasiniaanernut, misiliilluni qillerinernut, isumaginninnermut avatangiisinullu aatsitassarsiorfiup sunniiutissaasa misissornerinut, imminut akilersinnaaneranik misissuinernut, kiisalu piiaasinnaanermut qinnuteqaatit suliarinerinut.