Lilleholtip Kalaallit Nunaata isumakulunnera paasisinnaavaa
Maanna apeqqutaalerpoq Kalaallit Nunaat isumaqatigiissummut tassunga ilanngutissanersoq imaluunniit naalagaaffeqatiginni inissisimaneq pissutigalugu peqataanngiinnarluni.
Danmarkip klimaministeriata paasisinnaavaa Kalaallit Nunaa Parisimi silap pissusaa pillugu isumaqatigiissummut isumakuluutigimmagu:
- Isumaqatigiissummut peqataassanerluni imaluunniit inuussutissarsiutitigut ineriartortitsinissamut suli periarfissiinersoq aammalu nunarsiarmi CO2-mik aniatitsinermut annikilleeqataassanerluni Kalaallit Nunaanni oqallittoqarmat paasisinnaavara.
Aamma atuaruk COP 21-imi isumaqatigiissutip nunatsinnut tunngasortaa misissorneqarpoq
Nukissiuutinut, pilersuinermut silamullu danskit ministeriat Lars Christian Lilleholt taama oqarpoq, Kalaallit Nunaata silap pissusaa pillugu isumaqatigiissummut isumaliutersuutai pillugit qisuariarluni.
- Taamaattumik kalaallit politikerii maanna eqqarsarluartariaqarput isumaqatigiissummut ilanngunniarunik suut ajoqutaanersut suullu iluaqutaasinnaanersut eqqartorlugit, Lilleholt oqarpoq.
Naalakkersuisut naapertorlugit Kalaallit Nunaata inissisimanera pitsaanerusimassagaluarpoq nunap inoqqaavisa piginnaatitaaffii isumaqatigiissummi inatsisitigut atuuttussanngorlugit ilaatinneqarsimagaluarpata. Lars Christian Lilleholtilu naapertorlugu Danmarkip tamannarpiaq sorsuutigisimagaluarpaa.
Aamma atuaruk Parisimi isumaqatigiissummut Kalaallit Nunaat pituttugaanngilaq
Lars Christian Lilleholt ilanngullugu oqarpoq nunarsuarmioqatigiit akornanni soorlu Naalagaaffiit Peqatigiinni Danmark kalaallit soqutigisaat pillugit suli ilungersuuteqarumaartoq.
- Nunarsuarmioqatit akornanni, aammalu Naalagaaffiit Peqatigiinni apeqqut qaqeqqissinnaavarput. Aamma ilisimavara nunat allat isumaqatigiissutaajumaartunut nunap inoqqaavi ilanngukkusukkaat, Lilleholt oqarpoq.
Aperaarpullu Danmark nunap inoqqaavi pillugit ilungersornerusimasinnaannginnersoq, Lilleholt akivoq Danmarkip kisimiilluni aalajangersinnaanngikka:
- EU aqqutigalugu isumaqatigiinniarpugut tatituumillu isumaqatigiissuteqarluta. Isumaqatigiissut iluatsippoq, nunarsuarmioqatigiit tamarmik silap pissusaata allanngunnginnissaa akisussaaffitttut tiguaat, klimaministeri oqarpoq.
