Lidegaard Pituffimmut tunngatillugu GC-mit isornartorsiorneqartoq
- Nunanut allanut tunngasunut ministeriaqarfiup suliassani iluamik nakkutigisimanngilai. Greenland Contractorsimi pisortaaneq Peter Kofoed taama oqarpoq.
Inatsisilerituut naapertorlugit Pituffimmi sakkutooqarfimmi suliffeqarfinnik kiffartuussisussanik akuersissuteqarnissamut toqqaanissamullu USA-p siorna akisussaaffeqalernerata kingunerisassai pillugit Martin Lidegaard paasissutissanik eqqunngitsunik saqqummiussisimavoq.
- Suliariumannittussarsiuussinerup amerikamiunit akisussaaffigineqalernerata sutigut kinguneqarnissaa ilisimaqqissaarneqarsimanngilaq. Allaanngilaq uukapaasiarineqarsimasut. Tamanna kusananngilaq, Peter Kofoed Børsenimut taama oqarpoq, Nunanullu allanut tunngasunut ministeriaqarfimmi suliassanik iluamik nakkutiginnittoqarsimannginnera Greenland Contractorsimut akisuupilussuusoq erseqqissaatigalugu.
AAMMA ATUARUK Greenland Contractors Pituffimmi sullissiunnaassaaq
- Suliariumannittussarsiuussinernut marluusunut nukinnik atuisussaavugut, USA-milu aamma eqqartuussisutigut ingerlatsilluta. Tamakku akikitsuunngillat, Peter Kofoed aviisimut taama oqarpoq.
Suliami ingerlatseqatigiiffinnut inatsisitigut tunngasut eqqumaffigineqarsimannginnerarlugit Nunanut allanut tunngasunut ministeriaqarfik isornartorsiorneqarpoq.
- Nunanut allanut tunngasunut ministeriaqarfimmi kanngutsittoqarsimassajunnarsivoq, inatsisilerituut marluk professorit Søren Friis Hansen aamma Troels Michael Lilja, Børsenip oqaloqatigisimai taama oqarput.
Nunanut allanut tunngasunut ministerip Martin Lidegaardip suliaq oqaaseqarfigiumanngilaa, e-mailikkulli allagaqarluni Folketingimut salluliorsimannginnini aalajangiusimanerarlugu.
Peqatigitillugu ingerlatseqatigiiffiit danskit kalaallinillu pigineqartut, siorna suliariumannittussarsiuussinermi ajorsartut, kiffartuussinissamik isumaqatigiissutip maalaarutigineqarnerata suliarineqarnerata qanoq inerneqarnissaa isumalluarfigaat.
- Maalaaruteqarnitsinni taperserneqarnissarput qularutiginngilarput, Greenland Contractorsimi pisortaq, Peter Kofoed, taama oqarpoq.
AAMMA ATUARUK Suliffeqarfiit US Air Forcemut kiffartuussinissamut isumaqatigiissut pillugu maalaarput
Suliffeqarfiit sanaartugassanik suliassinneqartartut Aarsleff aamma Copenhagen Arctic, amerikami oqartussaasut maalaaruteqartarfiat GOA februaarip 20-iata missaani akissuteqariarpat naatsorsuutigineqartumik suliarimannittussarsiuusseqqinnissami neqerooruteqarniarlutik aamma piareersimapput.
