Leif Fontaine: IWC-mit anisa!
Nunarput IWC-mi susassaqanngimmat, taamaammat arfanniarneq pillugu ataatsimiitsitaliarsuarmit IWC-mit anisariaqarneranik Kalaallit Nunaanni aalisartut Piniartullu Kattuffiata siulittaasua Leif Fontaine naalakkersuisunut kajumissaaruteqarpoq.
Leif Fontaine kajumissaarinermini tunngavilersorami tupigusuutiginerarpaa Japanimiut tikaagulliup neqaanik niueruteqartalernissaminik siunnersuutertik qallunaat nunaata itigartinniarmassuk.
Leif Fontaine isumaqarpoq Atlantikup avannaani miluumasut pillugit ataatsimiititaliami NAMMCOmi arferit pillugit aqutsineq ingerlanneqarmat pisariaqanngitsoq arfanniarneq pillugu ataatsimiitsitaliarsuarmit ilaasortaanissaq.
Leif Fontaine aamma allappoq danskit Japaniut siunnersuutaannut itigartitsiniaramik ersersiinaraat Danmarkip arfanniarneq akerlerigaat kissalu IWC-mi ataatsimeeqataasarnermini ukiuni arlalinni maluginiartaleraa Danmarkip nunatta arfanniarnermut soqutigisai tunulliukkiartuinnalerai.
IWC nunanit arfanniaqqusinngitsunit ullumikkut aqunneqalersimasoq pissutsit ersersikkaat, KNAPK-p siulittaasua Leif Fontaine aamma oqarpoq.
